uMthunywa
Thokozile Mbedzi
ZILOKHU zibabaza zingaqedi izakhamizi zesigabeni seMunora ePlumtree ngesenzo senye indoda (27) eyathunywa enkomeni yona yayakhelela uMagwebu andubana izibophele.
UMncedisi Zulu oleminyaka engu-27 uzibophele ngeviki ephelileyo kulandela ukuqeda inyanga ezimbili engabonakali ngemva kokuthunywa ukuyadinga inkomo ngumalumakhe ngenyanga kaNhlolanja.
UMthunywa uzwe ukuthi uZulu esethunywe ukuyadinga inkomo kazange aphinde aphenduke ngekhaya waze wabonakala mhlaka 12 Mabasa ekhelela utshwala labangane andubana avuke ezibophele ngelanga elilandelayo.
Kubikwa uZulu wathunywa ukuyadinga inkomo yena wakhetha ukuya ebanganini lapho afika waqeda izinyanga engabonakali andubana abonakale esebukhelela labangane wathi esuka lapho wayazibophela.
Ekhuluma lentatheli kaMthunywa uMnumzana Simon Moyo omunye walabo abambone esetshwaleni labangane bakhe uthe lokhu engelankani ngoZulu owakhetha ukwekela ukwenza ayekuthunywe ngabadala waziyela kubangane.
“Lokhe singelankani ngesenzo esenziwe ngumfana lowu okhethe ukuthi lapho ethunywa ngabadala ukuthi aye enkomeni yena wakutshaya indiva waziyela ebanganini wayaqeda izinyanga ekhonale.
“Kuviki ephelileyo sambona enatha labangane bakhe bembuluza. Isimanga yikuthi kuthe kusisa watholakala esezibophele asazi ukuthi besekutheni njengoba wazisukela ngakibo ethunywe ukuyadinga inkomo kodwa wangayi,” kulandisa uMnu Moyo.
Isikhulumi samapholisa esabelweni seMatabeleland South ulnspector Loveness Mangena ebuzwa ngodaba lolu uthe solufikile ehofisini yabo.
“Uzulu nxa elohlupho kabikele amapholisa loba abaphathi besigaba ngoba lapha kutshengisa ukuthi laba bantu babengakhulumisani ngendlela eqondileyo ngoba ngeke umuntu ahlale isikhathi eside kangaka engabuyelanga lapho ahlala khona.
“Abantu kabakhululeke batsho okubakhathazayo ukuze singalahlekelwa yimpilo mahlayana njengalokhu,” kuphetha uInsp Mangena.
