uMthunywa
Cornelius Luphahla
ZIBAMBE oluphuphumayo izakhamizi zesigabeni seDlawa, eNkayi ngemva kokuba omunye umphurofethi webandla leZion evubane losobhuku wakule indawo kwabancane indawo bebanga umazakhela.
Isiga lesi senzakale kuviki ephelileyo lapho uMnumzana Dumisani Mpofu ongumphurofethi webandla leZion obhuqane khona loMnumzana Samuel Mathonsi bebanga uNkosazana Lilian Dube.
Kuzwakale ukuthi uMnu Mpofu wathola uMnu Mathonsi elele endlini kaNkszn Dube ntambama okwadala ukuthi amsukele ngenduku obeyithwele bahle baqala ukulwa kwaze kwalamula omakhelwane.
UMthunywa ukhulumisane loMnumzana Philani Nkomo oyisakhamuzi sakule indawo wathi yena wezwa sokungumsindo wathola uMathonsi selimele esilwa loMpofu.
“Mina ngathi sengilele kuntambama ngezwa umsindo komakhelwane ngagijima ngayakhona ngathola uMathonsi sevuza igazi ekhanda sewele phansi etshaywa nguMpofu ngenduku ngabalamula. Ngemva kwalokho kwafika abanye omakhelwane sababuza ukuthi babangani uMpofu wathi uthole uMathonsi elele loMaDube wasemtshaya.
“Sithe sisizwa lokho sahle sabasa kosobhuku omkhulu uNcube kwathi uMathonsi samusa esibhedlela seNkayi okuyikho oze waphuma khona ngeSonto,” kulandisa uMnu Nkomo.
Ekhuluma loMthunywa uNkszn Dube uveze ukuthi yena kakwazi ukuthi uMahlangu wayemtshayelani uMathonsi ngoba yena kathandani laye.
“Mina kangikwazi ukuthi uMpofu wayemtshayelani uMathonsi njalo angazi ukuthi kwakutheni aze angene endlini yami. Kutsho ukuthi ngabe ngangingelaMathonsi wayezangibhinya sibili. Ngalokhu noma nje indaba le ingakhulunywa kosobhuku kodwa ngizambophisa sibili uMahlaba.
“Okunye njalo mina uMathonsi ngiyavuma siphila sonke noma nje umkakhe ebengakwazi kodwa akukho engingakwenza ngoba wangilanda,” kutsho uNkszn Nkomo.
Umphurofethi uMpofu ebuzwa ngale indaba uthe yena ubethandana loMaNkomo yikho okwenze watshaya uMathonsi njalo uyamangala nxa uMaNkomo esemphika.
“Mina okwangicaphulayo yikuthi ngathola uMathonsi elele loMaNkomo khonapho esazi ukuthi ngithandana laye njalo kangithathanga. Lokhu kwenza ngamtshaya sibili kodwa ngiyamangala nxa uMaNkomo sesithi kazange wathandana lami,” kutsho uMnu Mpofu.
Usobhuku omkhulu wakule indawo uMnumzana Danisa Ncube ebuzwa ngale indaba uvumile ukuthi uyayazi wathi kodwa kakayithonisi.
“Indaba yokutshaywa kukaMathonsi nguMpofu bebanga uMaNkomo ngiyayazi sibili bayibika kimi iqeda kwenzakala.
Ngakho-ke okwakhathesi angikayithonisisi ngoba uMathonsi usanda kuvela esibhedlela ngizayithonisa engasila.
“Okunye ngeke ngikukhulume ngoba angikakutshelwa, ngizakukhuluma bengangazisa abanikazi,” kuphetha uMnu Ncube.
