uMthunywa
MANENGI amadoda angasekho kulumhlaba, ekhuzwa aphikelele, ephulele izigojwana endlebeni, abelihlongandlebe, angaze alimuka loba esexwayiswa ngasebempunga ngoba bona kade bebona izimanga zisenzeka emhlabeni.
Ngikhumbula omunye umngane wami wathi loba esexwayiswa ukuthi ehlukane lomfazi wenjiva, womisa ukhakhayi, kwaze kwayafika khonale eGoli ukuthi imali azisebenza kanzima, ethethiswa ngamabhunu umkakhe wayezidla lenye indoda, phela loluthuthuva lokukhonjwa ngumfazi womuntu uyabe uzokhela amalahle ekhanda.
Ufica amanye amadoda eklamasa, eqolotsha, ezigqaja ngokuthi bakhonjwe ngumfazi wenjiva ethumela amarandi umkakhe amhlephunele, uzwe besithi sidla eyeziwula.
Loba kuthiwa indoda izace kangakanani njalo ayila mandla okulwa kodwa ungavele ukhe amanzi emthonjeni wayo, labakibo asebafayo ingababiza bonke icela uncedo lokuthi bayincedise ukulwa.
Phela umuntu onsundu uyazonda avuke okunye kumbe amandla okubhidliza uyabe sewathethephi. Abanye bakhonjwa baze bayelala embhedeni othengwe ngenye indoda, lokhu yikudelela okungela mkhawulo. Kumele nxa ukwenza ukwazi ukuthi nxa ekuthola uhle akususele amanqe.
Injiva engikhuluma ngayo yathi ukuzwa ukuthi ukhona osevuna esivandeni sayo, yacela amalanga emsebenzini wayo, yeza ekhaya kungela muntu okwaziyo ukuthi iyeza, lemota owayevame ukuza ngayo wayeyitshiyile.
Wathi efika emzini wakhe wathola indwangu zehlise labantwana ezihlahleni ngoba umngane wami lo lomfazi wenjiva babengacabangeli ukuthi kukhona okungabaphazamisa, yathi ilunguza ngefasitela yathola owakhe umfazi owamkhuphela ezamabheka ezilitshumi etshaye amangqetshane sekungani ngokungumdodovu kwekhehla okukade kunatha imvanya, wazonda ngamandla wavela wakhipha uvolovolo wakhe watshaya amakhanda bafa bonke yena wabuyela eGoli. Kuze kube lamhlanje lokhe kungela qiniso ukuthi babulawa kuyini ngoba injiva akula ofuna ukufakaza ukuthi ngempela wayibona isiza, kodwa njengoba wazi ukuthi isintu sithi inyoni ziyabona.
Ayixabene. Umlobi uthinteka ku 0714355641.
