uMthunywa
Musa Janga
INDUNA uBekithemba Mbusi Dakamela (24) yeNkayi egcotshwe emavikini ambalwa edluleyo isithembise ukusebenzelana labantu bayo ukuze kulethwe ukuthuthuka kanye lokubambana esigabeni.
Ixoxisana lentatheli kaMthunywa induna uDakamela ithe izazama konke okusemandleni ayo ukuthi isebenze kuhle labantu bayo.
“Ukuba yinduna ngumsebenzi omkhulu njalo onzima kodwa kumele ngenelise ukusebenza labantu bami esigabeni. Ngingabe ngisasemutsha ngeminyaka kodwa iminyaka ayitsho lutho emsebenzini lo, kumele umuntu aqine ukuze akwenzayo kuphumelele,” kulandisa uDakamela.
Ebuzwa ukuthi uzenelisa yini ukulandela amasiko njengoba esasemutsha nanko phela intsha yaziwa kakhulu ngokuphambuka nxa kusiza kwezamasiko induna ithe amasiko ayinsika yoluntu kungakho-ke kumele alandelwe nguye wonke umuntu.
“Amasiko kumele alandelwe kungakhathalekile ukuthi ungakanani. Okumele ukwenze yikuthi kumele ubone ukuthi amasiko ayalondolozwa njalo ayahlonitshwa,” kuchaza induna uDakamela.
Imikhuba yonke ebisenziwa ngabadala lami ngizayilandela. Amacala sizawaxazulula edale njengokuba bekusenziwa ngabadala ngakho ngithi ebunduneni akulamnyaka ukuthi umncane kumbe umdala akukhangelwa, wena kumele wenze umsebenzi owawukhethelwayo,” kulandisa induna uDakamela.
Uphethe ngokuthi kulokunye akubonanyo ukuthi kunzima kuye njengomuntu osesemutsha kodwa uzazama ngamandla akhe onke ukuthi kuphumelele.
