uMthunywa
NguEmmanuel Ndlovu
KULENINA lelokitshini leMinyela koBulawayo elimiswe emthethwandaba ngemva kokuthembisa ukugwaza unyanewabo isitho sangasese ngoba ehlala lendoda isikhathi eside.
Isiga lesi esitshiye inkundla imangele senzakale ngenyanga edluleyo.
Umsolwa uOlivia Moyo (26) kubikwa wathembisa ukugwaza umamangala uOripa Moyo ngesikhathi bebanga indoda.
Ababili laba basesithenjini iloba behlala ezindlini ezehlukeneyo.
Isisusa sengxabano saqala ekuqaleni kwenyanga kaNhlolanja kuwonalo umnyaka lapho umnyeni ahlala lomamangala isikhathi eside okwaze kwacunula umsolwa.
Inkundla izwe ukuthi umamangala waqala ukuthumezela umkakhe imbiko ngomakhalekhukhwini esithi abuye ngakwakhe.
Umamangala waphendula lumbiko ngokuthi indoda yakhe yayizathatha isikhathi eside ilaye.
Lokhu kwathukuthelisa umsolwa yena owathinta umamangala ecingweni waqala ukumthuka qede wamthumela umbiko othi wayezamgwaza isitho sakhe sangasese ngengqamu lapho ababezahlangana khona.
Lokhu yikho okwabangela ukubotshwa kukamsolwa obemiswe emthethwandaba we-Western Commonage Commonage ngeviki edluleyo esetheswa icala lokuhlukumeza umamangala ngembiko.
Umsolwa ulivumile icala kukanti umantshi uTancy Chipumha Dube uqume ukuthi ayehlala ejele inyanga eziyisitshiya galombili.
Inyanga ezimbili zibuye zesulwa okweminyaka emithathu kukhangelelwe ukuthi angenzi icala elifanayo.
Ngalokhu umantshi ubuye wathi umsolwa ayekwenza i-community service esikolo se-Induba Primary.
Umtshutshisi bekunguKenneth Shava.