uMthunywa
YiNtatheli kaMthunywa
KULENDODA esanda kuphuma ejele etshiye izakhamizi zizidla amathambo engqondo kulandela isenzo sayo esitshwaqisa umzimba nanko isithethe indodakazi yayo eleminyaka engu-23 yayenza unkosikazi wayo wesibili.
Kubikwa indoda le, uRichard Mazviyo (50) weMashaviri koGutu waqala ukuhlukuluza emacansini indodakazi yakhe eyisimungulu, ikubanga lesikhombisa lemfundo yaphansi, njalo useleminyaka elitshumi ekwenza lokhu.
Intatheli zivakatshele emzini kaRichard ngeviki ephelileyo ngemva kokuba zithole udletshana lwensindabaphenduli le.
URichard owabotshelwa ukudlwengula indodakazi yakhe wapika iminyaka eyisithupha ejele, uthe izakhamizi zifuna ukungcolisa ibizo lakhe njalo zifuna abotshwe futhi.
“Angikaze ngidlwengule umntanami kodwa izakhamizi azingithandi, angizwisisi ukuthi kungani besitsho njalo. Mhlawumbe ngilomnyama. Ngabotshwa ngomnyaka ka-2014 kuthiwa ngidlwengule umntanami. Ngagwetshwa iminyaka engu-12.
“Ngemva kokuphuma kwami ejele, sengipike iminyaka eyisithupha umntanami wazithwala kunye lomkami, wonke umuntu wahle wathi umthwalo othwelwe ngumnatanami ngowami.
“Ngaphinda futhi ngabotshwa ngahlala inyanga ezimbalwa ngiku-remand kodwa behluleka ukuthola ubufakazi ukuze ngigwetshwe.
“Umntwana wakhona nguyena lo, bathi ufanana lami.
“Kodwa kungasenani angiselandaba lensolo lezi, sengintunyile.
Ungezelele wathi: “Yindodakazi yami njalo kangifuni kube lendoda emthathayo ngoba yisimungulu. Indodakazi yami isebenza nzima njalo kangiboni kulicebo elihle ukuthi kube lomuntu ozasehlukanisa. Abantu bathi yimi engenza umntanami wabayisimungulu kodwa lokho lakho ngamanga. Kulabobabakazi bami abathathu abafa ngosuku olulodwa yibo abalemimoya ehlezi phezulu komntanami abamenza angakhulumi.
“Izakhamizi kunye lezihlobo zami zilomona ngoba ngisebenza gadalala emasimini yikho befuna ngibotshwe ngibuyele ejele. Bangangigcona kodwa kabala bufakazi bakho lokho.
“Ngikhuluma nje umntanami wake wathathwa wahanjiswa eGokwe kubabakazi wami kodwa waziphendukela ngakho-ke angifuni muntu ozangithathela umntanami futhi,” kulandisa uRichard.
Unkosikazi kaRichard uWinnie Gebe oleminyaka yokuzalwa engu-46 utshele intatheli ukuthi ukhala ukusa kwamalanga ngenxa yesihluku asenziwa ngumkakhe.
“Ngikhala njalo nje inyembezi zami azomi ngenxa yezinto engidlula kizo lengikubona ebusuku lemini.
“Emalangeni umkami wavuka ebusuku wangitshiya wayaqoqoda exhibeni lapho okulala khona indodakazi yethu. Ngamlandela ngafika ngambuza ukuthi ufuna ukwenzani wangiphendula wathi udinga umlilo wokulumathisa igwayi.
“Saxabana kakhulu ngodaba lolu, lalamuhla inhliziyo yami lokhe ibuhlungu. Loba ngingambuza umntanami kangiphenduli ngoba kakhulumi,” kuphetha uGebe.
