uMthunywa
Thokozile Mbedzi
KULOSOMABHIZIMUSI wepulazini leDansvale eBubi oleminyaka engu-41 okubikwa ubophe omunye ujaha (20) inyawo andubana amhlahlele ngehloka wabuye wamtshaya ngensimbi umzimba wonke kubangwa intombi esebenzela usomabhizimusi lo.
Kubikwa usomabhizimusi lo, uKhumbulani Gumbo wenze lokhu mhlaka 28 Mpalakazi nyakenye ngehola lokuqala ekuseni.
Ekhuluma lentatheli kaMthunywa uBongani Dube uthe lokhe betshe amathe ngesenzo sikaGumbo.
“Asazi ukuthi uGumpo ungenwe yini yena elomuzi wakhe. Kukhanya uGumbo bamfica esendlini yokulala kantombazana osebenza e-tuckshop yakhe lijaha lakhe.
“Ujaha lo wasebikela unkosikazi wakhe owabuya wamthatha kodwa kukhanya lokho akuzange kumphathe ngoba phakathi kobusuku wavuka wayanyenya endlini yesisebenzi sakhe ehlome ngehloka kunye lensimbi.
U-Inspector Abednico Ncube
“Wafika wabopha ujaha lowo inyawo ngentambo zezicathulo esebuthongweni andubana amhlahlele ngehloka ekhanda wasethatha insimbi wamtshaya ngayo umzimba wonke,” kutsho uMnu Dube.
Kubikwa isisebenzi lesi sathi sibona ukuthi sokukubi saphanga sabikela abafowabo bejaha lalo abayibo abafika balilamulela.
Umamangala kubikwa waba lamanxeba atshonayo ekhanda, esandleni kunye lemzimbeni wonke.
Isikhulumi samapholisa koBulawayo ulnspector Abednico Ncube ebuzwa ngodaba lolu uvumile wathi solufikile ehofisini yakhe.
“Sichwayisisa udaba lwendoda eleminyaka engu-41 ezame ukubulala enye eleminyaka engu-20 ngehloka ekhanda yabuye yamtshaya ngensimbi umzimba wonke.
“Amapholisa axwayisa uzulu ukuthi ehlukane lomkhuba wodlame,” kuphetha ulnsp Ncube.
