uMthunywa
YiNtatheli kaMthunywa
ITHITHIBELE imuli yakoNcube eMakhondo Village 2 eMathambo ngemva kokuba usobhuku wakule indawo elawule ukuba zigebhe umufi zimsuse endaweni yakhe ziyemngcwaba kweyinye indawo.
Isiga lesi senzakale emavikini amabili adluleyo lapho uNkosazana Sithembile Ndlovu atshele imuli yakoNcube ukuthi igebhe umufi, uMbonisi Ncube iyemngcwaba kwenye indawo ngemva kokwehluleka kwayo ukuhlawula imbuzi abeyifuna ukuze angcwatshwe esigabeni sakhe, uMthunywa uyakuveza lokhu lamhlanje.
UMthunywa ukhulumisane loMnumzana Menziwa Mkhwananzi omunye wezakhamizi zakule indawo wachaza ukuthi laye wayekhona mhla usobhuku lo ethi abakoNcube bahlawule imbuzi.
“Lami ngangikhona mhla usobhuku lo ethi abakoNcube kabahlawule imbuzi yokungcwaba umufi nxa besehluleka kabamgebhe.
Angazi ukuthi kungani wayefuna bahlawule imbuzi le njengoba nje abantu bonke behlala bengcwatshwa kungahlawulwanga lutho kuye,” kutsho uMnu Mkhwananzi.
UMnumzana Maxwell Ncube omunye wezihlobo zikamuyi ebuzwa ngale indaba uvumile ukuthi yenzakala.
“Kuliqiniso sibili ukuthi usobhuku wathi sihlawule imbuzi emngcwabeni kamzukulu wami nxa kusehlula lokho simgebhe.
Noma nje watsho njalo kasizange sayikhipha ngoba sasingelayo yikho nje waphetha sesithi seyisa phambili indaba le,” kutsho uMnu Ncube.
UMnu Ncube uqhubekele phambili wachaza ukuthi usobhuku lo wasola ukuthi kungani bakhuluma bodwa njengomdeni ngokungcwatshwa kukamuyi.
“Thina sasibhujelwe ngubabakazi wethu kanye lomzukulu ngakho saqala ngokubeka ubabakazi.
“Sithe siqeda kubeka ubabakazi sahlala phansi njengomdeni sakhuluma ngokubeka umzukulu sangabizi usobhuku.
“Ngalokhu-ke wazonda wathi besikhulumani sodwa ngakho kufanele sihlawule imbuzi ukuze singcwabe umzukulu.
“Kasizange sakuzwisisa lokhu ukuthi singabe siphambanise ngaphi njalo lembuzi yakhona kasikayikhuphi noma nje savuma ukuthi sizayikhupha ngoba sisesaba ukugebha umuntu,” kutsho uMnu Ncube.
Ebuzwa ngale indaba usobhuku wakule indawo uNkosazana Sithembile Ndlovu uvumile ukuthi wathi imuli yakoNcube ihlawule imbuzi.
“Kuliqiniso sibili ukuthi ngathi imuli yakoNcube ihlawule imbuzi ngakho kuyangicaphula ukuthi bona balitsheleleni.
Okunye ngeke ngilitshele, ngenza umsebenzi wami njalo kungani bengazange bazokhulumisana lami njengosobhuku wabo,” kuphetha uNkszn Ndlovu.
