uMthunywa
Cornelius Luphahla
YINDABAMLONYENI indaba yeyinye indoda engusobhuku esigabeni seShabula eLupane okubikwa ihlanyisana lomkamzawayo owabhubhayo osokudale ukuthi ingasanaki imuli yayo.
Indaba le kubikwa silezinyanga yaqalisa lapho uMnumzana Willbroad Ngwenya athandana khona loNkosazana Lydia Nkomo okuyikho okwadala ukuthi angasananzi imuli yakhe, uMthunywa ukuzwile lokhu.
Kubikwa uMnu Ngwenya ngumntakamlisa wakule indawo uMnumzana Somanyanga okuyikho okudale ukuthi izakhamizi zisole isenzo sakhe zithi kufanele akhokhele ngobuqotho.
UMthunywa ukhulumisane loMnumzana Polite Dlomo oyisakhamuzi sakule indawo walandisa ngendaba le ethi yehlisa isigaba sakibo isithunzi.
“Indaba kasobhuku uNgwenya eyokuthandana loMaNkomo yaqalisa kudala sibili kodwa okuzwisa ubuhlungu yikuthi uNgwenya kasananzi imuli yakhe sesebenzela uMaNkomo. Lokhu kuyinto embi kakhulu esigabeni ngoba kusehlisa isithunzi.
“Okunye njalo usobhuku lo ngumntakamlisa ngakho kufanele akhokhele abantu ngendlela eqotho hatshi lokhu akwenzayo. Ngitsho ngoba intsha izafunda isifundo esibi esokulahla imuli zayo ngenxa yabomazakhela,” kutsho uMnu Dlomo.
Ebuzwa ngale indaba uMnu Ngwenya uvumile ukuthi uyayazi wathi iyamcaphula njalo kasakhulumisani loNkszn Nkomo ngoba abantu bazathi uthandana laye.
“Indaba yokuthi ngithandana loNkszn Nkomo kangiqali ukuyizwa, abantu bahlala bekhuluma kodwa kangikwenzi mina lokhu. Ngokunjalo khathesi kangisakhulumi laye ngoba abantu bengangibona ngilaye bazathi siyathandana kangikwazi ukuthi bangibangisani. Ngikhuluma nje kangiphumuli ngenxa yenkulumo ezivela ebantwini.
“Ngabe bengisazi ukuthi uyintatheli bengingeke ngakhuluma lawe sibili ngoba uzabhala indaba engingayikhulumanga. Loba kunjalo ngikupha insuku ezimbili ngemva kwalokho ungithinte ecingweni ngizakutshela ukuthi indaba le uyizwe ngobani ngoba ngisazoyidingisisa sibili. Ngemva kwalokho ngizababophisa abakutshelileyo ngoba mina kangesabi lutho ngilesibindi sibili,” kutsho uMnu Ngwenya.
Imizamo yokukhulumisana loNkszn Nkomo yehlule ngoba ucingo lwakhe lwalile ukungena.
