uMthunywa
Nkosilathi Sibanda
ABANYE bathi nguye ozayiphakamisa, abanye bathi bazalinda, bakholwe ngokubona.
Yiyo le imibono eyehlukeneyo ngokuqhatshwa kukaSihlangu Dlodlo, osengumaqhuzu omutsha weqembu leHighlanders.
Phakathi kwabantu abangamatshumi amabili lane abakade befuna lumsebenzi, uDlodlo uhambe phambili.
Uthole lumsebenzi obuphethwe nguRonald Moyo.
Njengoba eseqalisile umsebenzi, kuzalindwa ukuthi aphakulele abalandeli baleliqembu ukuthi yiphi inguquko azayiletha kuHighlanders.
Abalandeli beqembu abakhulume leZimpapers Sports Hub ngoLwesithathu baphose awabo amazwi kulokhu.
Bagcwale lakunkundla zokuxhumana kuFacebook, X lakwezinye bekhuluma ngodaba lukaDlodlo.
USipho Maphosa ohlala elokitshini leNtumbane koBulawayo utshele intatheli ukuthi kuDlodlo iHighlanders ithole umkhokheli qho.
“Mina angiphikisani lenyathelo elithethwe liqembu. Benze kuhle sibili. USihlangu Dlodlo yindoda yakoBulawayo osesebenzele idolobho impilo yakhe yonke. Kangiboni phutha ngokukhethwa kwakhe. Uyinkokheli ezaletha inhlelo ezizatshintsha indlela iHighlanders ebisenza ngayo. Kunengi obekutshayelelwa phansi kungenziwa, okumele kwenziwe yihofisi kamaqhuzu. Ngimfisela inhlanhla,” kutsho uMaphosa.
UNduduzo Ncube ubike ukuba uDlodlo kumele afike ngokuvusa okwakungenziwa.
“Kunengi azafika ahlangane lakho njalo laye njengomlandeli weqembu uyazi okumele akwenze. Sifuna axhumanise iqembu lamabhizimusi angenelisa ukusekela ngemali ukuze ezinye inhlelo zihlume.
“Okusilelayo kuHighlanders lusekelo lwemali epheleleyo. UDlodlo kadinge imali ezalungisisa inkundla zeClubhouse ukuze amaqembu ethu wonke kusukela kuBosso90 lakuHighlanders Royals athole indawo yokulolonga, ngoba silahlekelwa yimali sibhadala abanikazi bezinye inkundla,” nguNcube lo.
Enkundleni yeFacebook bakhulume bengaqedi ngokumtshayela izandla uDlodlo.
Umlandeli wodumo kuBosso u-Isaac Mbedzi uthe:
“Mhlawumbe yikuqhatsha okuhle okwenziweyo kuminyaka elikhulu yiBosso. Amhlophe Mnumzana.”
UNqobizitha Muvunzi uthe: “Isinqumo sebhodi sikhaliphile ngoba ngilokuzethemba okukhulu kunye lenhlonipho ngobaba uDlodlo, uhlakaniphe njalo uyinkokheli ezithobileyo, ephumeleleyo. I-CV yakhe ikutsho konke. Halala Mnumzana Dlodlo.”
Imbali kaDlodlo iveza ukuthi ungumuntu webhola njalo ibizo lakhe liyaziwa. Wazakhela udumo engusihlalo weBantu Rovers futhi uselesikhathi ephatha inhlelo zobukhokheli emdlalweni. Wake waba ngumaneja wenhlelo zabadlali ababalisela uEsrom Nyandoro, owayengukaputeni wamaWarriors.
UDlodlo uke waba ngumphathi omkhulu wezokuthengiselana kunkampani ye-Innscor.
Uthe esuka ku-Innscor, wakhetha ukuthi aqine ngokulima njalo abanye bamazi kakhulu ngemisebenzi yakhe kwezokulingisa lokuloba imidlalo.
Kulethemba ukuthi umaqhuzu omutsha lo uzaphiwa amandla wonke ukuthi enze umsebenzi wakhe kungela oxokozelayo.
