uMthunywa
LIYIFUNDE ivaliwe inina lesigabeni sakoChireya eGokwe nanko phela lithe ngemva kokuncinda uluju lwemvelo lomalumalo laqala ukuzenwaya umzimba wonke njalo sokuze kwaphela amaviki amabili lizithwebuza ngalindlela osokubangele ukuthi libe manxebanxeba.
ULinnet Pazwakarimwa okucatshangelwa ukuthi uleminyaka engu-26 yokuzalwa, kubikwa uzidla amathambo engqondo njalo uyazisola ngokwehluleka ukuzithiba aze enze ihlazo lokuya emacansini lomalumakhe.
Indaba le ize yayafikiswa enduneni yalesisigaba uChiya Chireya sekudingwa indlela yokuthi uLinnet athole usizo nanko phela kubikwa usezenwaya ngitsho langeziqu lamatshe ngoba elunywa umzimba wonke njalonje kungela kuphumula.
Okubuhlungu ngesimo sakhe yikuthi kasabuquthi ngitsho ubuthongo ngoba kumele enwaye okwenze waze wachaza kumkakhe ukuthi ukulunywa lokhu kuqale ngemva kokuya emacansini lomalumakhe.
Induna uChireya ibikele uMthunywa ukuthi bacabangela ukuba umalume kaLinnet engabe wafakwa ulunyoka ngumkakhe.
“Indaba le yabuya yazobikwa ngumkaLinnet ngemva kokuba esechaze ukuthi wahlangana lomalumakhe emacansini.
“Kungakho njengabakhokheli sikholelwa ukuba umalume lo angabe walungiswa yikho nje inina leli lathi lisanda kuqeda kuganga lomalumalo lahle laqala ukwenwaya umzimba wonke okungazwisisekiyo njalo okungelampumulo,” kulandisa induna Chireya.
Induna yengezelele yathi lokhu yathwetshulwa yingwe kayikaze ibone umuntu esenwaya ngale indlela.
“Lalamhla lokhu uLinnet wenwaya okwesabekayo, sokuze kwedlule amaviki amabili. Ngambona mina ngawami la enkundleni, ezenwaya okungapheliyo aze athathe lesiqu azinwaye ngaso osokubangela lokuthi abe lezilonda ezichinca igazi ngoba uyenwaya lumuntu,” kuchaza induna uChireya.
Induna ithe umkaLinnet uthi ufuna indaba le ingene edale ukuze kutholakale isicazululo.
“Lanxa indoda kaLinnet yona kungazange kuyihlasele ukulunywa lokhu ithi ifuna indaba le ithoniswe edale ukuze umalume lomkakhe bajeziswe.
“Kungakho indaba le izathoniswa ngeSonto ekuseni,” yinduna uChireya.
