uMthunywa
Thokozile Mbedzi
KAZILAMATHE izakhamizi zesigabeni seMaluzo ngaphansi kwenduna uMathe eGwanda ngemva kokuba usane olulomnyaka owodwa lubhudlukele enkonxeni lwafa.
Inkemekeme le yenzakale ngoLwesibili kuviki ephelileyo lapho uNkosazana Mpoko Sijiya (24) atshiya khona umuyi uAllen Madongo olomnyaka lenyanga eziyisitshiya galolunye lodadewabo oleminyaka engu-13.
Kubikwa umuyi wayedlala wasewela phakathi kwenkonxa wahle wedlula okwenza kwabikelwa omakhelwane.
UMthunywa uxhumane loMnumzana Kilitshabile Nare oyisakhamuzi sakule indawo othe ulokhu etshe amathe ngesiga esehlela imuli yakoSijiya.
“Kangilankani ngesiga lesi esehlele imuli yakoSijiya njalo ngangingakholwa ukuthi liqiniso ngaze ngakholwa sengibona umntwana eselele engasanyikinyeki. Amanzi la akamthathanga isikhathi umntwana wahle wadlula.
“Lokhu kwamangalisa umuntu wonke ngoba abantu babesasuka kukhefu belibele nje bengacabangeli lutho olubi,” kuveza uMnu Nare.
Ebuzwa ngale indaba uNkszn Sijiya uthe yena wayengekho eye ezitolo.
“Mina ngangivela ezitolo ngathola umntwana esedlule ngengozi yamanzi kodwa basebemkhuphile enkonxeni.
“Lokhu kungidabule kakhulu ngoba bengijwayele ukubatshiya nje kodwa ngiphenduke ngifice kungela hlupho, okwalamuhla kuyangimangalisa.
Udaba lolu lwabikelwa amapholisa aseduzane.
Isikhulumi samapholisa esabelweni seMatabeleland South uAssistant Inspector Nkosilathi Sibanda ebuzwa ngale indaba uthe sebeyizwile njalo bakhuthaza uzulu ukuthi ananzelele abantwana njalo bengatshiyi abantwana bodwa, kungaba ngcono bacele omakhelwane babancedise nxa behamba.
“Indaba yomntwana owele enkonxeni elamanzi wafa sesiyizwile ngakho sikhuthaza uzulu ukuthi engatshiyi abantwana bodwa, kabacele omakhelwane loba umuntu omdala abakhangelele abantwana nxa behamba,” kuphetha uAsst Insp Sibanda.
