uMthunywa
Ethel Ncube, NGEMPELA udiwo lufuze imbiza!
Kukhanya ezomculo zisegazini lemuli kaMadlela Skhobokhobo nanko izibulo lakhe, uBoithabelo “Basotho” Ndlovu uselodumo kwezomculo njengoyise.
Indodana kaMadlela le, isikholisise uzulu ngengoma yayo ethi Impumelelo. Ingoma le ize levidiyo, esiqale ukusabalala enkundleni zokuxhumana. Le yingoma ehlanganisa ubungcwethi bokuphekwa komculo nanko kukhona lomsindo wama-Piano ojabulisa ama-2K labadala abathanda lumhlobo womculo.
Labo asebethole ithuba lokulalela umsebenzi kaBasotho, banqekuza amakhanda, bevuma ukuthi umfana upheke imbabazane yedlalade.
UMthunywa uxhumane loBasotho othe useqalile uhambo lwakhe lokuthi aziveze kwezomculo.
“Okokuqala ngithanda ukubonga ithuba elingiphe lona ukuba lami ngethule umsebenzi wami. Ngiqala ngqa ukuba lengoma ebiza mina. Ukuhlabela bengivele ngikuthanda. Bengihlabela esontweni labahlabelayo. Kwesinye isikhathi bengihlabela lobaba njalo ngilethemba abalandeli bomculo banginanzelela lapho. Ingoma le, ngiyibize ngokuthi Impumelelo ngeyabasakhulayo abathanda amaPiano,” kutsho uBasotho.
Uthe ingoma yakhe isitholakala enkundleni zokuxhumana zonke njalo ucela abantu bayidinge, bakholise.
“Ingoma yami isikhona enkundleni zokuxhumana kuYouTube lakwezinye inkundla. Ngicela lingisekele ngiphakame. Ividiyo nanso ngeyenu, bukelani lizikholisele.
“Ngiyabonga kubo bonke abangincedisileyo ukuze umsebenzi lo uphutshe. Kubathandi bamaPiano ngithi nanso ingoma, kasiyisekeleni sonke singene enkundleni zokuxhumana siyibukele.”
