uMthunywa
YiNtatheli kaMthunywa
KULOWESIFAZANA okubikwa ukuba wagada indizamtshina esuka eUnited States elenjongo yokuphambanisa isintu sokungcwaba umuntu kuleli, kulandela ukufika aphande ibhokisi elingcwatshelwa abafileyo elalingelasidumbu, walitshisa eMadziva, esabelweni seMashonaland Central ngoMvulo.
U-Eugenia Nancy Mashiri ohlala eUnited States kubikwa wagada indizamtshina waphenduka ekhaya ngemva kokuzwa ukuthi omunye umnewabo, uMusafare Mupanduki ulenhlabathi ayicupha lapho okwabekwa khona umnewabo uItayi Mupanduki, eFlorida eUnited States.
U-Itayi obengudokotela, kubikwa wabhubha ngemva kokuba kungozi yemota eFlorida lapho abekwa khona.
UMusafare lo laye uhlala khonale eUnited States, kubikwa wahlela ukuthi athathe inhlabathi yalapho okwabekwa khona uItayi eJacksonville, eFlorida ngenjongo yokuthi bazoqhuba isintu sokumbeka eMadziva.
Lokhu kubikwa kwenzakala mhlaka 19 Mpalakazi, lapho usobhuku okutholakale ukuthi nguMasiiwa akhokhela uhlelo lolu.
UNancy kubikwa laye wafika ngosuku okwaqhutshwa ngalo uhlelo lolu elabanye abantu ababili ababezenza abaphurofethi baphambanisa indlela izinto ezaziqhutshwa ngayo.
Indaba le yamangalwa edale lenduna uMutumba, uMnumzana Marufu Mandaza lapho uNancy ahlawuliswa inkomo lembuzi.
UNobhala wedale lenduna le uDudzayi Kufinya ugcizelele indaba le esithi uNancy ukhangelelwe ukuthi ahlawule isigwebo sakhe inyanga kaZibandlela ingakapheli.
“Imuli yakoMupanduki yamiswa edale lenduna uMutumba mhlaka 20 Mpalakazi 2021. U-Eugenia Nancy Mashiri (Mupanduki) uhlawuliswe kulandela ukuphambanisa isiko lesintu kulandela ukuphanda ibhokisi elalilomlotha walitshisa.
“Induna uMutumba imhlawulise inkomo lembuzi njalo ukhangelelwe ukuthi akubhadale inyanga kaZibandlela ingakapheli,” utshonjalo uKufinya.
Elinye ilunga lemuli yakoMupanduki lithe uNancy wafika ehamba labaphurofethi ababili uSobhuku uMasiiwa ethungamela uhlelo lokubekwa kuka Itayi ngesiko lesintu.
Kubikwa lokhu sekwedlule, uNancy wacela ukukhuluma losobhuku lo esithi kajabulanga ngalokho okwenziweyo njalo kwakungelamsebenzi.
UNancy kubikwa esekhulume losobhuku okwesikhatshana, wasuka labaphurofethi bakhe ababili bayaphanda ibhokisi leli balitshisa.
“Wayesethesa uDkt Musafare Mupanduki ukuthi wayesebenzisa lokhu ukuziqinisa. Kwacina kubizwa amapholisa ngoba kwasekuliwa,” kutsho ilunga lemuli le.
Isikhulumi samapholisa eMashonaland Central uInspector Luckson Mundembe uthe indaba le kayikafiki emahofisini abo.
