uMthunywa
Innocent Kurira
UMDLALI wenguqu wakuleli uMarvelous Nakamba usethole isicoco saphezulu esivela kukhansili yeLuton Town, eNgilandi.
NgoLwesibili, uNakamba unikezwe isicoco sikaSodolobho wakulindawo eseMayor’s Unsung Black Hero Award. Isicoco lesi ngesiphakamisa abaNsundu abatshisekela ukuncedisa ukutshintsha impilo zabantu zibengcono.
USodolobho weLuton Town, uMaria Lovell nguye mathupha ophakamise uNakamba ngesicoco lesi.
Umbiko lo ubekwe emphakathini yinhlanganiso yeLuton Social Justice Unit, ekhasini layo lika-X ebulenjini.
“Ikhansili yeLuton Town inikeze uMarvelous Nakamba isicoco sokuba liqhawe ebelingabatshazwa, elidinga ukuphakanyiswa.
“Uthole usekelo olukhulu ukwedlula abanengi. Uyinkuthazo edolobheni lethu lakwabasakhulayo endaweni yethu,” kutsho umbiko lo.
Ekuqaleni komnyaka uNakamba waba ngumdlali wesine ukungena kuLuton Town, ngemva kukaChiedozie Ogbene, Mads Andersen lo Tahith Chong.
Umaqhuzu weLuton Town uRob Edwards uhleli ebabaza umdlalo kaNakamba.
Umdlali lo, wabasegudwini ngoNhlangula ngesikhathi abalandeli be-Aston Villa besithi kasuswe eqenjini ngoba kalancedo kubo.
UNakamba wabalilunga leqembu leVilla okwamasizini amathathu kodwa kuthe kusuka umqeqetshi uSteven Gerrad, kwaba lenguquko eqenjini, kwacaca ukuthi kaselandawo yokudlala. Ngokufika komqeqetshi u-Emery, uNakamba ubengasela ndawo, esephikelela ngokukhuhla ibhentshi. Lumqeqetshi wamtshela ngokuphangisa ukuthi kakho kuzinhlelo zakhe.
Ngalokho uEdwards waqhatsha uNakamba eqenjini leLuton Town ekuqaleni komnyaka.
