uMthunywa
Ethel Ncube
IZAKHAMIZI zeSilobela zithabe zimanzi te ngesenzo someli wazo kudale lePhalamende esokuphathisa ekwakheni amakilasi ezikolo ezitshiyeneyo ezikulindawo nanko phela abanye abafundi bebefunda bengaphansi kwezihlahla.
UMthunywa uzwe ukuthi uKhomuredi Mthokozisi Manoki Mpofu ongumeli weSilobela kudale lePhalamende waphathisa ngokuthenga izamende kuzikolo ezingu-21 ezibalisa ezemfundo yaphansi leyaphezulu.
Intatheli kaMthunywa yethekelele kulindawo yakhuluma lezakhamizi ezitshengisele ukuthokoza ngalokhu okwenziwa nguKhmrd Mpofu.
UNkosazana Lisa Zhou uthe abantwana sebezafunda kuhle besemakilasini kukanti abanye bebefunda ngaphansi kwezihlahla ngenxa yokusilela kwamakilasi ezikolo.
“Indawo yethu ilazo izikolo sibili kodwa bekusilela izindlu zokufundela. Abantwana bebefundela phandle kugodola ngoba amakilasi engeneli. UKhmrd Mpofu wancedisa ngezamende zokwakha kanye lokufakisa amagetsi kulezo zikolo.
“Njengezakhamizi asazi lokuthi simbonge njani uKhmrd Mpofu, usiphathise kakhulu njalo khathesi siyazi ukuthi abantwana sebeyafunda kuhle bengatshiswa lilanga kumbe ukugodola phandle,” kubika uNkszn Zhou.
Uqhubekele phambili wathi bekunzima ukuthi abantwana bafunde kuhle ngoba nxa bephandle kunengi okuyabe kusenzakala okubenza bacine bengasalaleli umbalisi.
“Ukuthi umntwana afundele phandle kumenza angalaleli kuhle ekilasini ngoba kulezinto ezinengi ayabe ezibona phandle. Besikhathazeka kakhulu nxa izulu selisina sebeminyana endlini eyodwa. Kukanti khathesi sebezifundela kuhle ezindlini zabo ezakhiwayo,” kutsho uNkszn Zhou.
Ekhuluma loMthunywa omunye umzali uMnumzana Bekezela Dewa olomntwana ofunda eFatima Primary ubike ukuthi esikolo lesi bekusilela impahla yemfundo yaphansi.
“lsikolo sathola impahla ye-Early Childhood Development (ECD) okugoqela imijingo lokunye okokudlalisa. Kuluncedo kakhulu lokho ukuthi bathole okokuzilibazisa ngoba kufanele babelakho kubanga abakilo hatshi ukuthi bacine bekhwela ezihlahleni bacine belimala,” kutsho uMnu Dewa.
Intatheli ikhulumisane loKhomuredi Mpofu oveze ukuthi njengomuntu omele abantu ukubona kufanele ukuthi ahlale ephathisa lapho abona kusilela impahla ethile.
“Ngaphathisa ngokunika izikolo impahla etshiyeneyo okugoqela isamende, ukufakisa amagetsi kunye lokunye okunengi ezikolo.
“Ngancedisana leRural Electrifiation Agency ukuthi kubelamandla kagetsi ezikolo ezibalisa iSimana, leMaholokohlo njalo sihlele ukuthi siqhubeke sifakisa amagetsi kwezinye izikolo.
“Engikhangelele ukukwenza yikuthi kwakhiwe amadamu alitshumi ukuze indawo phose zonke zenelise ukuba lamanzi. Ngifisa njalo ukuvuselela ama-irrigation abalisa eDonsa, Loreto leMuchape abantu bazilimele izilimo ezitshiyeneyo zokubaphilisa,” kuphetha uKhmrd Mpofu.
