Uncategorized

Unogada utholakala efile egalajini

25 Feb, 2021 - 00:02 0 Views
Unogada utholakala efile egalajini Abednico Ncube

uMthunywa

Thokozile Mbedzi
KULONOGADA welinye igalaji elokitshini leMakhandeni edolobheni lakoBulawayo otholakale efile kuviki ephelileyo emsebenzini.

UMlungisi Ncube oleminyaka engu-42 utholakale efile emsebenzini wakhe njalo isidumbu sakhe besilamanxeba okwenza kucatshangelwe ukuthi kukhona okutshaya amanzi.

Kubikwa enye indoda ebizothatha inqola endaweni le yiyo ethole uNcube efile ngemva kwehola lesithupha ekuseni.
Ekhuluma lentatheli kaMthunywa omunye ohlala duzane legalaji leli, uNkosazana Magret Moyo uveze ukuthi bona bazwe abantu sebekhuluma ukuthi kulomuntu ovuke efile.

“Thina sizwe abantu sebememeza ukuba abantu kababuye bezobona isimanga kulomuntu osebulewe. Kukhanya kulondoda obetshiye elindise inqola yakhe othe esezoyithatha wazama ukubiza njengensukwini kwangabi lomuntu osabelayo wasesithi ekhangela wathola unogada lo esendlini yakhe yokulinda kodwa esefile wasebiza abantu.

“Asazi ukuthi kuhambe njani lathi kumbe njalo ngabantu abafike bezoganga abakwenzileyo lokhu siyazibuza nje

imibuzo kodwa kakho ongasiphendula,” kuchaza uNkszn Moyo.

Amapholisa aziswe ngendaba le njalo ayachwayisisa.

Isikhulumi samapholisa akoBulawayo uInspector Abednico Ncube uthe badinga ongabe elolwazi lokuthi uMlungisi Ncube oleminyaka engu-42 otholakale efile ubulewe ngubani.

“Sichwayisisa indaba yendoda etholakale ifile endaweni lapho ebilinda khona ngenye indoda ebizothatha inqola yayo.

“Sicela amalunga omphakathi angabe elolwazi ngezigelekeqe lezi bazise amapholisa aseduzane labo loba ukutshaya ucingo ukuze labo abenze lokhu bajeziswe,” kuphetha uInsp Ncube.

Share This:

Sponsored Links