uMthunywa
ZiNtatheli zikaMthunywa
KULANDELA ukukhitshwa kodaba lukandofa osedlisa imuli yakoTshongwe eMagwegwe North inkobe ezilamatshe, kulomphurofethi obesezinikele ukuncedisa imuli le, laye osebuye wahlaselwa ngundofa lo nanko kubikwa uhluthunelwe umakhalekhukhwini ngesikhathi ethandazela imuli le.
Lokhu kwenzakale ngoLwesithathu kuyonale iviki.
UMthunywa uzwe ukuthi umphurofethi uTafirenyika Siziba uthe ethandazela uGogo uMayinesi Tshongwe ukuze undofa lo asuke wathathelwa umakhalekhukhwini waphinda wathatha le-R100 kagogo.
Intatheli zixhumane loGogo uTshongwe oveze ukuthi ngoLwesibili abazange babuquthe ngitsho ubuthongo ngondofa lo.
Ekhuluma loMthunywa ugogo uveze ukuba lokhe bethwele qatha.
“Sithole umphurofethi obebuye lapha esithi uzosikhulekela. Uthe ngesikhathi ethandaza wathathelwa ucingo lwakhe ayelubeke phezu kwetafula.
“Ngesikhathi kuthathwa umakhalekhukhwini uGogo laye kwamtshaya ekhanda ngelitshe kwamthathela imali engangeR100. Umzukulu kasafundi kuhlala kumdabulela izigqoko useze esesesaba lokuya kwabanye ngoba kuyamnqunula,” kubika uGogo Tshongwe.
Uqhubekele phambili eveza ukuba lokhu bedinga usizo kuzulu ngoba ukusa kwamalanga emini lebusuku kibo sekufanana, kabalakho ukuphumula.
“Sidinga usizo bantu beNkosi, asilali lasemini akuhlaleki sitshona sijikijelwa, ubuthongo asisabazi. Sithwele nzima, sicela abasizayo basikhuphe kumalangabi esiphakathi kwawo.
“Sincedeni bo, omunye umzukulu wami kasafundi ngenxa yokudatshukelwa yizigqoko. Abancane yibo abalokhe besahamba esikolo ngoba undofa lowu uhlukuluza omkhulu ngazo zonke izikhathi.
“Umntwana usemlilweni, kasadlali njengabanye abantwana, usehlala eseduzane lathi abadala ngazo zonke izikhathi,” kuphetha uGogo uTshongwe.