uMthunywa
OBENGUMBHIDISI wekhwaya yaseFree State ekhitshwe ngeSonto emncintiswaneni iClash of the Choirs kuMzansi Magic usexwayise amajaji ngokuthi kumele aqaphele izinto azitshoyo ngoba “zingazibulala izingane ezingamalungu ekhwaya”.
USfiso Ncwane uthe amajaji ohlelo avele akhulume enganaki ukuthi kwesinye isikhathi izinto azitshoyo azakhi kulalokho zibulala ukuzethemba kubaculi.
“Amajaji awalayo inhlonipho. Avele akhulume nje noma kanjani. Uma ungujaji kumele uqaphele into oyitshoyo. Izinto azikhipha emlonyeni aziyakhi iNingizimu Afrika ngokomculo. Uma ubuka iX Factor lo-American Idols amajaji akhona akhuluma ngenhlonipho,” kutsho uNcwane.
Wenze isibonelo lapho amajaji athi abelindele lukhulu ekhwayeni kaKelly Khumalo yaseGoli.
“UKelly waze wazikhalela ethi akangajajwa ngento amajaji ayilindele kuye kodwa amjaje ngento ayibonileyo,” kutsho uNcwane.
Amajaji alo mncintiswano nguRebecca Malope, Anele Mdoda, uNcwane athe uyena oyinkinga kakhulu, loZwai Bala obuye angabi khona kufike amajaji amenywayo.
Uthe ezinye zezinto ezitshiwo ngamajaji zikhitshiwe kazivezwanga kumabonakude.
Uthe uzakhuluma labadidiyeli bohlelo uma sebehlangana sekuyokwenziwa isiqephu samanqamu.
Uthe yize ekhitshiwe kodwa ufunde lukhulu ngokuba kulo mncintiswano ikhwaya ezowuwina ezohlomula ngetsheki yeR1 million.
“Ngesikhathi kukhitshwa ikhwaya yaseKZN ngimane ngazitshela ukuthi sengizomela izifundazwe ezimbili okuyiyo leFree State. Ngifunde ukuzinikela emsebenzini. Kwesinye isikhathi omunye umuntu uyacasuka ngakho ngaphambi kokuthi lizilungiselele kumele uqale ukhulume laye noma abanye bexabene, kumele uqale uzame ukulungisa leso simo bese lisebenza,” kutsho uNcwane.
Uqhube wathi: “Ngithole nokuthi ngaziwe ezindaweni ezinengi lakwamanye amazwe ase-Afrika okuyinto enhle kimi.”
AbakwaMzansi Magic abatholakalanga, kuze kwashaya isikhathi sokutshicilela, isolezwe belifuna baphawule ngokutshiwo uNcwane ngamajaji.
IClash of the Choirs idlala kuMzansi Magic ngo-5.30 ntambama ngeSonto. — Ubulembu
