uMthunywa
Salibonani bafundi.
Ngithemba liqhuba kahle ezifundweni zenu lilungiselela imihloliso yokuphela komnyaka.
Siyaqhubeka ngezifundo zethu zenkulumo ngomumo.
Izifundo lezi ziyasakha njalo zisenza sibe ngabantu emphakathini.
Lamhla sizaqhubeka sikhangela izinkulumo esizisebenzisayo izinsuku zonke eziveza ukweyisa ezinye izinto esizitshelwa ngabazali ngoba sizitshela ukuthi thina sazi ngcono.
Inengi lethu singoTomasi, sifuna ukukholwa ngokubona.
Lokhu sikuveza ngezinkulumo zethu.
Kubi bafundi ukukholwa ngokubona.
Inengi lethu licina selingene ezinkingeni ngenxa yokungafuni ukulalela lokulandela izinqumo zabazali.
Umuntu nxa ekhuzwa kumbe etshelwa ulutho oluthile yena engqondweni yakhe azitshele ukuthi uzakuzwa ngokuwa.
Yebo kambe kokunye ungaphumelela kodwa kokunye ukufuna ukukholwa ngokubona kucina sekukugwenxa ngaphambili uzibone usuwele phakathi kweliwa elingaphumekiyo.
Ake sihluze izinkulumo zokweyisa ezingaphansi:
1. UThemba udlala labafana abakhulu kulaye. Abafana laba bathanda ukuthatha okudakayo njalo balala befika ngakibo ebusuku.
UThemba laye usezibandakanise lalabo bafana.
Ulala eqoqodela unina phakathi kwamabili.
Unina nxa emkhuza uthi,
“Mina sengikhulile. Sengizibonela okokwenza.
Angifuni ukube ngihanqwa angathi ngiyimbuzi yeKhisimusi.”
Unina uphendula athi,
“Asazi mntanami. Angithi ukholwa ngokubona njengoTomasi kodwa ukuhamba ebusuku kulomvunzo wakho omubi”
Kungakapheli amaviki amabili nje, uThemba utshaywa ngabantu bamtshiye ebangwa lezibi.
(a) Ubona angathi uThemba uzakuzwa njani ngesehlakalo esimehleleyo nxa ekhumbula amazwi kanina?
(b) Unina kaThemba uzakuthini ngesehlakalo lesi?
(c) Sifundo bani esizatholwa nguThemba ngesehlakalo lesi?
2.USihle uthandana lejaha lakoSizwile elithandwa zintombi zonke esigabeni.
Unina kaSihle uyananzelela ukuthi lokhu sekungadala uhlupho olukhulu emntwaneni wakhe ngakho uphanga amhlalise phansi amxwayise ukuba atshiyane lejaha leli ngoba lizamfaka emanyaleni.
USihle uthi,
“Ijaha ngelami. Angazi nje abantu bazihluphelani ngalo. Konke okuzakwenzeka phakathi kwami lejaha lami akudingi bani.”
Kungakahlali nsuku ngaki ijaha likaSihle liqala ukugila imikhuba yalo lilahle uSihle njengamafinyela.
(a) Inkulumo kaSihle iveza similo bani ngaye?
(b) Mizwa bani ezafikela uSihle nxa ijaha seligila imikhuba?
(c) Waphambanisa ngani uSihle okumenza acine esegalula enkingeni engaka?
Kuyavela-ke ngaphezulu bafundi ukuthi kwesinye isikhathi akumelanga umuntu aze akholwe ngokubona izinto seziwonakele.
Kuhle ukulalela ube usulungisisa kungakonakali ngoba okonakeleyo kunzima ukukubisela endaweni yakho.
Abafunakali oTomasi empilweni bafundi. Asihlanganeni ngeviki ezayo.
