uMthunywa
Innocent Kurira
UMDLALI wasemuva oweHighlanders uPeter Muduhwa ungomunye wabadlali abakumaqembu akuleli ababizwe kumaWarriors ngumqeqetshi uNorman Mapeza.
AmaWarriors alungiselela ukuyadlala kumqhudelwano wamazwe amane eMalawi ngeviki elizayo.
Kulumqhudelwano, iZimbabwe izadibana leMalawi, Zambia leqembu leKenya.
Abanye abadlali bakuleli ababizwe nguMapeza babalisa onozinti uMartin Mapisa oweDynamos, Donovan Bernard oweChicken Inn, abadlali basesiswini beSimba Bhora uJunior Makunike loWalter Musona labo babiziwe.
Kulandela ukubizwa kukaMudihwa, iqembu leHighlanders ibike ukuba limtshayela isandla umgadli lo.
“Sihalalisela umsekeli kakaputeni uPeter Muduhwa ngokubizwa kuqembu lesizwe,” kutsho iBosso.
Kusenjalo, inhlanganiso yeZifa Normalisation Committee ikhethe ukunikeza uNorman Mapeza isikhundla sokuba ngumqeqetshi wesizwe okwesikhatshana.
Inengi labadlali elibizwe eqenjini ngelidlalela phetsheya kwelizwe.
UMapeza okwakhathesi ngumqeqetshi weqembu leFC Platinum, elidlala kuligi yeCastle Lager njalo usenqobe izicoco zeligi le ekuleliqembu. UMapeza uzancediswa ngumqeqetshi weNgezi Platinum Stars, uTakesure Chiragwi.
“IZifa iyajabula ukwazisa ukuthi uNorman Mapeza ukhethwe ukuba ngumqeqetshi okwesikhatshana weqembu lesizwe kumqhudelwano wezizwe ezine ozaqhutshelwa eMalawi. Umqhudelwano lo uzodlalelwa eLilongwe kusukela mhlaka18 kusiya ku-26 kuMbimbitho. Uzahlanganisa iMalawi, Kenya, Zambia leZimbabwe,” kutsho inhlanganiso yeZifa.
Iqembu lamaWarriors:
Onozinti: Martin Mapisa, Donovan Bernard, Marley Tavaziva
Imvimbi: Shane Maroodza, Divine Lunga, Gerald Takwara, Kevin Moyo, Teenage Hadebe, Peter Muduhwa, Munashe Garananga, Emmanuel Jalai, Jordan Zemura, Joey Phuthi
Esiswini senkundla: Marshall Munetsi. Junior Makunike, Andy Rinomhota, Tivonge Rushesha, Tawanda Chirewa, Walter Musona
Abagadli: Tinotenda Kadewere, Daniel Msendami, Tawanda Maswanhise, Macauley Bonne
