uMthunywa
Cornelius Luphahla lo Ethel Ncube
AZILAMATHE izakhamizi zesiqintini seKenilworth, eNyathi ngemva kokuhlahlulwa kwesinye isalukazi kuviki ephelileyo kwakhitshwa ikhanka eliphilayo ebelisetshenziswa njengomtshova wabakhunkuli esigabeni lesi, uMthunywa ukuzwile lokhu.
Kuzwakale ukuthi ikhanka leli, elithutshe enkundleni liqhutshwa ngumnikazi walo, uGciniwe Mnkandla owaziwa ngokuthi nguNaSikipa belithwala abakhunkuli abayisificaminwe mibili sikhathi sinye nanko phela kubikwa umhlane walo ubunanabuka nxa sebesiyakwenza imishikashika yabo.
UMthunywa esizwa ngale inkemenkeme yendaba kazange aphozise amaseko ngoba uphange wayawela esigabeni lesi lapho athole indaba yekhanka le ingundabamlonyeni.
Esinye isakhamuzi esixoxe loMthunywa ngalindaba, uNkosazana Sihle Nkomo uthe izakhamizi yizo ezabiza owafawafa ngoba zisehlelwa yizigigaba ezinengi empilweni zazo.
“Abantu besebekhathele ngokufelwa, ukungatholi lutho emasimini, ukuhlaselwa yimikhuhlane engazwisisekiyo yikho baze bacela kusobhuku ukuthi kubizwe abantu bazohlanza isigaba.
“Owafawafa ababizwayo basinceda kakhulu ngoba abantu bebegcine impahla yobuthakathi eyesabekayo,” kuchaza uNkszn Nkomo.
Uqhubekele phambili wathi okwamtshwaqisa umzimba kakhulu yindaba yekhanka likaMaMnkandla.
“Ngangikhona ikhanka lelo lithutsha enkundleni njalo uMaMnkandla wavuma ukuthi ngelakhe ngoba nguye owahamba wayalithatha wathi baligada ebusuku labangane bakhe.
“Ikhanka leli lalilezihlalo ezinjengezomtshova eziyisificaminwe mibili eqolo njalo uMaMnkandla wathi yikho lapho abahlala khona labanye bakhe nxa sebesiya “emsebenzini,” kulandisa uNkszn Nkomo.
Esinye isakhamuzi esikhulume loMthunywa uMnumzana Lizwe Jubane, uthe uMaMnkandla kazange athande ukuchithela inkundla isikhathi ngoba wavela nje wavuma wathi ikhanka leli baligada besiyakhunkula.
“UMaMnkandla wathi ebuzwa ukuthi ulani akusebenzisa ubuthakathi wathi ulekhanka kanye lodiwo olulegazi labantu abababulalayo.
“Ngemva kwalokho kwathiwa kayethatha izinto zakhe lakanye samangala simbona ethutsha eqhuba ikhanka ephethe lodiwo,” kulandisa uJubane.
Ekhuluma lentatheli uNkosazana Mnkandla ubike ukuthi yena wafika enkundleni evela esontweni.
“Mina ngadlula kuboWafawafa ngivela esontweni ngababona sibili kodwa angizange ngisondele. Abathi ikhanka lelo lalilezihlalo ezingu-12 balamanga ngoba lona lalilezihlalo ezingu-8.
“Ngeqiniso ikhanka lakhitshwa sibili kodwa buzani bona oWafawafa,” kulandisa uNkszn Mnkandla.
UNkszn Mnkandla ubuye walandula ukuthi ikhanka lelo ngelakhe kukanti kuzwakale ukuthi ngalelolanga nguye owahamba wayazithathela wabuya eqhubana lalo emphakathini njalo wavuma phambi kukazulu engabanjwanga ngamandla.
Intatheli zikhulumisane lomunye wezihlobo zikaNkszn Mnkandla owale ukuqanjwa ngebizo. Uveze ukuthi uNkszn Mnkandla wahamba kubowafawafa njalo wathi ulekhanka lodiwo olulegazi labantu.
“Wahamba ugogo enkundleni bathi kayelanda ikhanka lakhe aligada esiyaloya ebusuku wabuya eliqhuba lodiwo lwakhe eluphethe ngezandla.
“Ngiyamangala lamuhla ukuthi seliphika yena walivuma. Kutsho ukuthi sesesaba lina ukuthi alitshele iqiniso ngoba kuyayangisa ukuvuma into enjalo,” kutsho isihlobo lesi.
Ilunga lemuli leli liqhubekele phambili lathi njengemuli bahlawuliswe inkomo yokukhitshwa kwezinto lezi.
Usobhuku walesisigaba uMnumzana Micah Mhlophe uveze ukuthi wezwa ukuthi kulezinto ezakhitshwa koNaSikipa.
Ubuye wabika ukuthi uNaSikipa wabhadala inkomo eyodwa sebetshisile izinto zakhe.
Kusenjalo uMthunywa uzwe njalo ukuthi ekuhlahlulweni lokhu kwakhitshwa njalo ondofa ababelesimo somuntu kodwa bebafitshane okwabodoli.
