uMthunywa
ZULU kaNdaba!
Ngithemba lisakhumbula ukuthi ngalithembisa ukuthi kuwonala amaviki sizabe sixoxisana ngendaba eziphathelane lengozi ezibhekane labomahotsha andubana siphathe ezesibaya sesizwe lezokugqekezwa kwemizi yethu lasendaweni zamabhizimusi (unlawfull entry).
Yebo ye, yizo lezo indatshana zethu kodwa, likhululekile bakwethu ukuthi lisazise ngezinye njalo izindaba zakoCALA loyise uSigilamkhuba lanxa zingayisizo lezo engiyabe ngizithembisile.
Ezabomahotsha sazigqiba ngoba ngatsho ukuthi singeke saqhubeka ngazo ngoba zivele ziyisono. Sabakhuthaza-ke odadewethu ukuthi kabakhethe eminye imisebenzi engcono. Phela amacala omthetho mhlawumbe angaba ngcono ngoba uyagwetshwa ngokufaneleyo usesekuwonalo umhlaba kuphele. Pho isono siphelela kuNkulunkulu esekuthethelele kumbe ususeGehena. Yeyi madoda, kunzima!
Omahotsha kabawadali bodwa lawomacala ngoba labesilisa abaphatheka kulowomsebenzi labo bayabe bedala umlandu lesono ngokufanayo. Labo-ke sibakhuthaza ukuthi, xwayani umthetho bakwethu lingalindeli ukubotshwa kumbe ukungenelwa ligcikwane lengculazi. Xekanani layo leyo mikhuba emibi.
Nxa kusala, tshayelelani idolo phansi uphele lowomoya. Kasihlonipheni imitshado labomkethu mahlabezulu. Sizigqaje ngokuziphatha lobuntu njengesizwe.
Kwezesibaya sesizwe, sithe thina silombiko wenkomo ezavunjululwa ngamapholisa eZRP abona ngezesibaya sesizwe esiqintini samapholisa esaziwa ngelokuthi Lupane Police District esipholiseni. Lesosiqinti yiso esiphatha indaba zezifuyo emangweni ogoqela iLupane ngokwayo, iNyamandlovu, iNsuza, Tsholotsho lazo zonke ezinye indawo ezigqagqeleyo.
Baqhuba umsebenzi omuhle kabi besebenza lomanyano wabo lozulu lapho okwatholakala khona inkomo ezilophawu lomuntu alwetha igama lokuthi, “KBZ”.
Ngithemba lisakhumbula njalo bakwethu ngilikhuthaza ukuthi ukusetshenziswa kwemitshiso egoqela esawuthi yi-personal brand ngesiNgisi kuhle.
Silinxusile-ke lonke abalemitshiso emihle-le eveza umnini wesifuyo ngqo njalo ngokubalulekileyo. Siqhubeka sisithi thina, yanini emahofisini amapholisa aseduzane lani uma lingabanikazi benkomo ezilomtshiso othi “KBZ”. Kumbe uma lilolwazi lwalapho umnikazi walezinkomo angabe ekhona, sibikeleni silondoloze isibaya sesizwe.
Sicela Lingadinwa, lithinte uSergeant Manyangadze kunombolo zikamakhalekhukhwini ezithi 07123378768. Njengokubona kwenu bakwethu ukuthi ngiluphindile loludaba, linkuthazo siyiqinisa kakhulu ngoba sifuna ukuthola umnikazi.
Uma lisakhumbula balandeli bakaMthunywa lezindatshana zethu zikaWatsha Tsotsi lizakubakwazi ukuthi ngethula ukuthi silabancedisi abanengi kwezokulondolozwa kwesibaya sesizwe.
KuZRP, laba ngabagoqela uSenior Assistant Commissioner Bernard Dumbura okhokhela uluhlu lwamapholisa alawula ngezesibaya sesizwe (olwe- ZRP Anti-stock Theft Unit) labanye. Esethula inhlolisiso yakhe kugwalondaba lwamapholisa iThe Outpost November 2014, uSnr Asst Commr Dumbura ugcizelele ngobuhle bomtshiso esithi bugoqela okulandelayo:-
Khona ukuveza ukuthi umnini wezifuyo ezithile ngubani ikakhulu lapho udaba lwalezozifuyo soluthethwa emthethwandaba yamacala. Sathi thina, umtshiso uyibufakazi obuqotho njalo obungephikiswa, iprima facie evidence;
Ukusika lokutshisa uphawu ezifuyweni kuthuthukisa uhlangothi lwabalimi abaqinisa ezezifuyo ngoba kuphathisa ekuphawuleni izifuyo okucina kusenza kubelula ukuzithengisa lokuzithenga ngoba zibalulekile okokuthi othengayo kathandabuzi ukuthi zimsulwa.
Ukusetshenziswa komtshiso, kuphungula inani lamacala ezifuyo ezitshontshwa ezigabeni zethu. Obunye ubuhle balokhu ngobugoqela ukuthi abantu abakulowomango bonke bayabe sebezazi kunye lamapholisa alawula ezezifuyo kulezozigaba. Kungaba lomuntu othinta lezozifuyo ngokungekho emthethweni, kulula ukubananzelela lokubabamba.
Kuloludaba lwesibaya sesizwe, kubikwa uhlangothi lweVeterinary Services Department luthi kusiyafika umnyaka ka-2011, isibaya sesizwe sasesimi kunani lezinkomo ezingu-5,2 million kodwa ezasezilomtshiso zaziyisilinganiso se-20% yalesosibaya kuphela. Yeyi madoda, nanko umsebenzi bo! Lokhu kukhomba ukuthi i-80% yezinkomo ezikuleli yayingakabi lomtshiso. Mhlawumbe uphawu lukhona ngoba kuvele kulisiko ukuthi umlimi asike izifuyo zakhe uphawu.
Umtshiso muhle ngoba inkonjani lezikeyi sokukunengi kakhulu endlebeni zezifuyo okokuthi kubanzima ukuthi kwazakale ukuthi le ngekabani. Ezinye izifuyo uthola sezisikwe indlebe zombili ubususwela ukuthi pho umnini wazo lezo zifuyo ngubani?
