uMthunywa
YiNthatheli kaMthunywa
UMPHATHINTAMBO wogatsha lwezemfundo yaphansi laphezulu useveze ukuthi okwenza banquma ukuthi izifundo zokulima zifundiswe kuGiredi 7 yikuthi bafuna ukuhlomisa abafundi besesebancane ngoba phela umthwentwe uhlaba usamila.
Umbiko lo wethulwe nguMqondisi wezemfundo esabelweni seMashonaland East emele uDokotela Lazarus Dokora ku-workshop ye-Conservation of agriculture yabafundi ebiqoqwe yinhlanganiso yeZimbabwe Farmers Union.
“Inhlanganiso yeZimbabwe Farmers Union (ZFU) ibuye lohlelo kanye lephurojekithi enhle ezikolo.
“Ukuba kwazi ngezokulima ngokunye kwemisebenzi yezandla eqakathekileyo kakhulu yikho nje khathesi sokungumthetho kunhlelo zokufunda kwabafundi baphansi laphezulu ukuthi benze lesi isifundo,” kutsho uDkt Dokora.
Uthe intsha kayizange ifundiswe ukuthi ezokulima zilakho ukuthuthukisa umkhonomi.
“Kungumlandu wethu ukuthi sifundise izifundo lezi masinyane ezikolo. Abatsha abanengi baya emadolobheni ngobunengi babo ngenhloso yokuyadinga imisebenzi kodwa ngenxa yokuthi imisebenzi le kabayitholi bacina besenza bephatheka ezintweni ezingalunganga.”
UDkt Dokora uthe iphurojekithi le izaphathisa abantu ukuthi basebenzise indlela yokulima elondoloza umhlabathi (conservative agriculture) ezigabeni.
“Ezikolo yikho lapho okulendawo lapho okulinywa khona yizakhamizi ndawonye lababona ngokuthuthukiswa kwezikolo,” kutsho uDokora.
UMqondisi weZFU, uMnumzana Paul Zacharia uthe sekulamakilabhu abalimi abatsha asebunjiwe ezikolo.
“Ukusebenzelana kwethu ndawonye logatsha lwezemfundo sokusabalalise amaqembu abalimi abatsha ngoba asekhona ezikolo ze-primary kanye le-secondary,” kutsho uZacharia.
