uMthunywa
Ncekwenhle Ncube
ZICITSHE amalangabi avuthayo izakhamizi zeNdabankulu indawo esesigabeni seKezi kulandela ukuzwa ngomunye umdeni oxabane kwabaluthuli emngcwabeni baphose babambana ngemphimbo kubangwa ilifa.
Unkosikazi kamuyi uGetrude Mahlangu lomnewabo uFanson Sibanda bebemiswe phambi komthethwandaba weTredgold koBulawayo ngoMvulo kuviki ephelileyo besetheswa icala lokuthatha imali kamufi uThembani Mahlangu ebhanga ngokungekho emthethweni ngemva kokufa kwakhe.
Umtshutshisi kulelicala uMnumzana Moses Lufilo ubikele inkundla ukuthi mhlaka 27 Mpandula nyakenye, kulelanga elilodwa umuyi etshonile abasolwa bathatha imali kamuyi ebhanga bayisebenzisa bekwazi mhlophe ukuthi ngokwenzenjalo badala icala.
Kwathi ngelanga elilandelayo imuli yakoMahlangu yazama ukuyathatha imali ebhanga yokuqhuba umngcwabo lokuthenga ukudla kodwa bathola ingasekho.
Ngaleso sikhathi abebhanga babazisa ukuthi unkosikazi kamuyi nguye othethe imali.
Bazama ukubuzisisa umalukazana ngemali lokuthi yayisebenzeni kodwa abazange bazuza impendulo eqondileyo.
Inkundla izwe ukuthi kwabakhona ukulwa ngelanga lomngcwabo okuyikho okwadala ukuthi kubizwe amapholisa ukuzobopha abasolwa laba.
Ebuzwa emthethwandaba mayelana lecala aletheswayo uSibanda uchaze ukuthi bona imali bayithatha bebhadala imota yokuthwala isidumbu kanye lokuthenga ukudla esililweni.
Ubuye wathi babengakwazi ukuthi abakwenzayo kulicala njengoba babeqhuba umngcwabo.
UNkosikazi kamuyi uMahlangu uthe omamangala bafuna ukumthathela impahla ayitshiyelwa ngumkakhe yikho nje bemethesa icala elingekho.
“Angibonicala lokuthi ngithathe imali esetshenzelwe ngumkami ukuze simbeke kuhle. Okunye okusobala yikuthi izihlobo zomkami labobabazala bafuna ukungithathela ilifa lami,” kuchaza uNkkz Mahlangu.
Ubuye waveza ukuthi ngesikhathi kungcwatshwa umkakhe balanyulwa ngomakhelwane lezinye izakhamizi ezazikhona sokulwiwa kubangwa lona ilifa leli.
Inkundla izwe ukuthi umuyi uMahlangu ubenothile njalo utshiye engalobanga ukuthi impahla zakhe zizacithwa njani phakathi kwemuli.
Umamangala uNkosazana Charlotte Mahlangu ongudadewabo kamuyi utshele inkundla ukuthi kulobugwelegwele obudlalwa ngumetheswacala uGetrude lomfowabo uSibanda.
“Lababantu bafuna ukutshontsha impahla zomfowethu. Umuntu engaba lesibindi sokuthatha imali kamufi engakangcwatshwa.
“Mina ngizwela umntanomfowethu ngoba uzasala ehlupheka impahla zikayise sezithethwe.
Kodwa lokhu ngeke kwenzakale ngisawadla amabele,” kufunga uNkszn Mahlangu.
Umtshutshisi uthe okwenza uSibanda akhanye esekela udadewabo njalo nguye otshayela imota kamuyi kutshengisa ukuthi laye kulokunye akufunayo kulifa leli.
Umantshi kulelicala uNkosazana Gladmore Mushove uthe indaba le izaqhubekela phambili mhlaka 16 Mpandula lapho inkundla ezabe isithole ubufakazi obugcweleyo.
