uMthunywa
YiNtatheli kaMthunywa
UMQANDO okhona lezinsuku endaweni ezinengi zelizwe uzabakhona kuze kube ngoMgqibelo kukanti kukhangelelwe ukuba kuzafefeza kusasa, kutsho ababona ngezomumo womkhathi abeMeteorolgical Services Department (MSD).
Lokhu kubangelwe yisimo sezulu esibizwa ngokuthi yi-‘Cut-Off Low’ esibangele ukuna kwezulu kwezinye ingxenye zelizwe.
Kusukela ngeSonto, koBulawayo lakwezinye ingxenye zelizwe bekulomfefezo njalo kuqanda.
Kusitathimende seMSD kubikwa ngesikhathi kulomqando lo, izinga lokutshisa ngeke ledlule i-19 degrees Celsius kuze kube ngoMgqibelo.
“Isimo esiphansi sezulu esisemkhathini esibizwa ngokuthi yi-Cut-Off Low sesiqalile eZimbabwe.
“Kukhangelelwe ukuba sizangena sigcwalise amanzi ngobukhulu baso. Lokhu kuzaphelekezelwa ngumoya oqondayo ovelela south-east coast of Southern Africa,” kutsho isitatimende.
“Kukhangelelwe ukuthi kuzakuba lomfefezo elizweni kusukela ngoLwesithathu ebusuku mhlaka 29 Nhlangula. Kuzabe kuqanda, kulomoya njalo kulamayezi kuze kuyefika umhlaka 2 Ntulikazi ngesikhathi semini.”
Abakhangela ngomumo womkhathi baxwayise mayelana lokuba kungaba lezulu lesiqhotho kwezinye indawo kodwa akumelanga kukhangelwe njengongqwaqwane.
Kubikwa ukuba umumo womkhathi uzakhudumala kusukela ngeSonto.
Ababona ngezomumo womkhathi bakhuthaze abalimi ukuba bavune ingxenye yezilimo zabo okumele zivunwe ukuze zingaphanjaniswa ngumfefezo ozakubakhona.
Umqando lo ungadala umkhuhlane wofuba njalo abantwana labadala kulula ukuhlaselwa ngumkhuhlane lo.
Uzulu ukhuthazwa ukuba agqoke impahla ezikhudumalayo ngesikhathi sokuqanda lesi njalo bananzelele ukuba bangabasi umlilo endaweni eziligceke.
