uMthunywa
Nomthandazo Ndlovu
KUNDIZE igemesi kwenye isonto yeZayoni esigabeni seWunga eBeitbridge umfundisi sephezu komunye umzalwane ngomqwayi esithi umkhipha idimoni.
Lesisiga esitshiye abazalwane bebandla leli elitsha bebambe owangaphansi senzakale ngoMgqibelo lapho uMnumzana Prosper Masunda abhuqe khona uMnumzana Richard Sibanda esithi umkhipha umoya omubi omlandelayo.
Ekhuluma loMthunywa omunye umzalwane ongathandanga ukuqanjwa ngebizo uthe loba uMasunda evale ngokuthi ubekhulekela uSibanda abantu abanengi esigabeni bayakwazi ukuthi bekubangwa intombi.
“Mina angazi ukuthi uMasunda ungenwe yini ngoba kuthiwa uyasiza sibili ekukhulekeleni abantu manje nxa selwela izintombi asisakwazi, yena vele kasuye walapha, wabuya lapha ebiziwe esuka eNkayi ezoncedisa umama lo ahlala laye ngoba uyagula, yikho ukuqala kwakhe ibandla lakhe lapha.
“UMasunda loSibanda babanga intombi, uCynthia Ncube owayethandana loSibanda.
Kubikwa uMasunda wathi efika kule indawo uNkszn Ncube wala uSibanda waqala ukuthandana loMasunda,” kuchaza umzalwane lo.
Esinye isakhamuzi esithande ukubizwa ngokuthi nguSaPhathi nje kuphela sithe bamangala besemlindelweni ebusuku sokuyisibhubhubhu sodwa uthuli soluvala inyanga abantu sebenamathelene besilwa.
“Thina samangala uMasunda setshaya uSibanda ngomqwayi abewuphethe sengani sengene emoyeni kodwa lokhuyana hatshi lathi sazibonela ukuthi bekuyikulwa,” kutsho uSaPhathi.
“USibanda laye wacina sebisela ukuthi aphunyuke ngoba kwakunzima aluba engamlwisanga wayezalimala ngoba kwakulomlilo futhi eduze owawungamtshisa,” kuqhuba uSaPhathi.
Ebuzwa ngodaba lolu uMnu Sibanda uthe kalankani ngesenzo sikaMasunda, yena abantu bebemhlonipha besithi ngumuntu osiza abantu.
“Asazi, mhlawumbe ubengikhipha lelodimoni alibonileyo kodwa mina ngokubona kwami ngumuntu obesilwa, mina uCynthia ngangimbonisa kuphela njengomuntu ebengisamthanda ukuthi ananzelele abantu laba bokuza abathembekanga,” kutsho uMnu Sibanda.
Imizamo yokukhulumisana loMasunda yehlule ngoba ucingo lwakhe lwalile ukungena njalo sebuyele kibo eNkayi.
