uMthunywa
KULOMPHATHISIKOLO wesikolo seLuba Secondary eBinga ozithezele olulenkume ngemva kokutshontsha imali yesikolo engange-$609 qede wazigeza ngokuthi ubefuna ukubhadala izikwelede.
Umphathisikolo lo ongumsolwa uKillion Munkuli oleminyaka yokuzalwa engu-43 wenze ihlazo leli phakathi kwenyanga kaZibandlela loNtulikazi kuwonalo umnyaka.
Umtshutshisi wecala leli uMnumzana Bruce Maphosa ubikele inkundla yeBinga kuyonale iviki ukuba umsolwa wenza ukuganga lokhu ngoba ethi ulenhlupho ezinengi emzini wakhe.
Kubikwa phakathi kwenyanga lezi umsolwa wathatha imali le waqonda layo ebhanga samuntu ofuna ukuyayifaka kodwa waphambuka wayazisebenzisela engagqize qhakala ukuthi imali leyo yayimele ithuthukise isikolo.
Kubikwa umsolwa waphinda njalo wathunywa njalo ukuba ayefaka enye imali wakwenza lokhu.
Kuzwakale ukuba isikolo sathi sesifuna imali le kwayiwa ebhanga kwatholakala ukuba imali le yayingekho okwabangela ukuba umsolwa abuzwe njengoba kunguye owayehambe ukuyayifaka.
Umsolwa kubikwa wavuma ukuba imali le wayisebenzisa ngakho wahlawula imali engange-$400 kuphela. Umsolwa kubikwa kasahlawulanga eyinye imali eyayisele okwabangela ukuba isikolo lesi sidinge abacubungula ngezezimali (auditors).
Ekuchwayisiseni kwabacubunguli laba kwavela ukuba umsolwa wayengazange aqede ukubhadala imali ayeyisebenzisile okwabangela ukuba abotshiswe.
Ebuzwa ngumantshi uNkosikazi Ailen Munamati umsolwa ulivumile icala lakhe wathi watshontsha imali le ngoba elenhlupho ezibalisa izikwelede zabomakhelwane wakhe.
Ngemva kokuzwa ubufakazi lobu umantshi ugwebe umsolwa ukuba ahlawule imali engange-$209 ngemva kwalokho apike entolongweni okwenyanga eziyisithupha.
