uMthunywa
YiNtatheli kaMthunywa
KULOMPHATHISIKOLO wesikolo seSomgolo eLupane okubikwa wenza umathanda esikolo lesi nanko phela usephendule impahla zesikolo ezigoqela ikhompuyutha kanye lezitina zokwakha amakilasi wazenza ezakhe osokubangele ukuthi abazali babe munyu ngezenzo zakhe.
Kuzwakale ukuthi umphathisikolo lo waqala ubugwelegwele lobu ngoZibandlela kumnyaka ophelileyo lapho athi i-laptop yesikolo ilahlekile evela koBulawayo wabuya njalo wathengisela esinye isakhamuzi izitina zesikolo.
UMthunywa uxhumane lesinye isakhamuzi sakule indawo uMnumzana Kholwane Ndlovu walandisa indlela umphathisikolo lo aqala ngayo ubugwelegwele lobu.
“NgoZibandlela kumnyaka ophelileyo ngemva kokuba izakhamizi zalapha zikhiphe imali yokuthenga i-laptop yesikolo umphathisikolo wezwakala sesithi ubehambe layo koBulawayo yasilahleka endleleni.
“Ebuzwa ngabazali wathi uzayithenga inyanga kaMbimbitho ingakedluli kodwa isimanga yikuthi kazange wayibhadala sokuze kulamuhla njalo khathesi kasikwazi lokuthi ungaphi,” kuchaza uMnu Ndlovu.
Ekhuluma lentatheli uNkosazana Samkelo Mkhwananzi uchaze ukuthi umphathisikolo lo wathengisela esinye isakhamuzi izitina zesikolo ngudlu.
“Umphathisikolo lo wathatha izitina zesikolo wazipha umgcinisihlalo wekhomithi yesikolo ethi siyekwakha ngazo isambuzi sazo. Isakhamuzi lesi sathi sesibuzwa ngale indaba sathi izitina lezi sizithengile okwadala ukuthi izakhamizi zimbiselise noma nje wayesezithethe,” kutsho uNkszn Mkhwananzi.
Elinye ilunga lekhomithi yakulesisikolo elingathandanga ukuqanjwa ngebizo lichaze ukuthi isakhamuzi lesi sasingazithenganga izitina lezi sasizithathele.
“UNkosazana Mpala wayengazithenganga izitina lezi kodwa wayeziphiwe ngudlu ngumphathisikolo lo. Sathi sesibize umhlangano simbuza ngale indaba wathi uzazibisela ngoba wayezithethe ngokungekho emthethweni eqamba amanga ethi uzithengile njengoba engumgcinisihlalo wekhomithi yalesisikolo,” kutsho ilunga lekhomithi leli.
Ebuzwa ngale indaba uNkszn Mpala uvumile ukuthi indaba le uyayazi noma nje eyalile ukuba izitina waziphiwa ngudlu.
“Izitina mina ngazithenga abantu balamanga nxa bethi ngaziphiwa ngudlu ngumphathisikolo njalo sengazibisela.
Ngiyazi vele ukuthi abantu balapha balamanga njalo bayangizonda yikho bengiqambela amanga,” kutsho uNkszn Mpala.
Umphathisikolo lo ebuzwa ngale indaba uchaze ukuthi kalamvumo yokukhuluma lamaphephandaba.
“Mina angilamvumo yokukhuluma lentatheli ngakho indaba le kungcono liyeyibuza ezakhamizini hatshi kimi,” kutsho uMnumzana G. Ndimande.
UMsekeli kaMqondisi wezemfundo esabelweni seMatabeleland North uMnumzana Jabulani Mpofu ebuzwa ngale indaba uchaze ukuthi kabakayizwa ngakho bazayihlolisisa.
“Indaba kamphathisikolo weSomgolo besingakayizwa ngakho sisayihlolisisa ukuze senelise ukuyilungisisa,” kutsho uMnu Mpofu.
