uMthunywa
YiNtatheli kaMthunywa
UMongameli welizwe, uMnangagwa izolo uveze ukuthi umnyaka ka2023 kusiya ku2024 wokulima ngowendlala kulandela ukungani kuhle kwezulu ngenxa yesomiso esibangelwe ngu-El Nino okwenze ukuthi imuli ezinengi zingatholi lutho emasimini, okutsho ukuba zidinga ukuncediswa ngokudla.
Isimemezelo sokuthi lonyaka yindlala sizancedisa ekuqoqweni kokudla okwesibanga esikhulu kujongwe ngitsho labakwamanye amazwe, abeUnited Nation’s, umhlaba wonke jikelele kunye lenhlanganiso ezizimeleyo.
Ekhuluma lentatheli eseState House eHarare izolo ekuseni, uMongameli welizwe uMnangagwa uthe abantu abedlula i2,7 million kabalakudla okwaneleyo.
“Isigaba sokulima lesi esika2023 kusiya ku2024 kasenzanga kuhle njengokwakukhangelelwe ngenxa yeEl Nino ebekhona.
“Ngokunjalo, indawo eziyisilinganiso se-80 phesenti zithole izulu eliphansi kwelikhangelelweyo,” utsho njalo.
Uthe ilizwe lilime amahekitha angu-1 728 897 omumbu kanye lezilimo ezilenhlamvu ezincane. Ngokuya indawo elinyiweyo bekumele ibe isitsho ukuthi kuzakuba lesivuno esikhulu kodwa hatshi. Okunye okubuye kwaphambanisa yikuqhamuka kwemihogoyi elizweni lonke jikelele ehlasele isilimo.
Uthe ngesizatho lesi ulamandla ngaphansi komthetho kaSection 27 (1) weCivil Protection Act ukuthi amemezele ukuthi kulesimo esiyinhlekelele.
