uMthunywa
Thokozile Mbedzi
ZILOKHU zisebuhlungwini izakhamizi zeMbenene eMadlambuzi ngemva kokuba omunye umntwana ebulewe yintambo yokujinga.
Kubikwa umntwana lo osengumuyi uPhumulani Ncube obeleminyaka engu-8 ubejinga labanye bezidlalela ngesikhathi kusenzakala lingozi. Omunye umfakazi oqotho wakulindawo oxhumane lentatheli kaMthunywa uveze ukuthi lokhe wathwetshulwa yingwe kakaze akubone loba akuzwe okunje ngoba abantwana bayadlala kusa kwamalanga ngakho ubona engani umntwana lo uhlungiwe.
“Ngethukile ngilapha, vele angikwazi lokuthi ngithini ngoba abantwana vele mdalo wabo kumele badlale kodwa lokhu osokusuke kwenzakala kuhlasimulisa umzimba ngoba indlela okwenzakele ngayo ayizwisiseki ukuba umntwana ongaka angaze azibulale. Zikhona ingozi hatshi le esibhekane layo lapha yinsindabaphenduli uqobo.
“Mina bengizidlulela ngezwa umkhosi wabantwana kunye logogo ngoba abantwana bahle babiza ugogo womntwana ngemva kokuba sebebone omunye wabo esephefumula ngendlela abangayizwisisiyo. Umkhosi lo yiwo ohle wangethusa lami ngahle ngazihlupha ukuba kuyini okwenzakalayo yikho ngilubhekise khona.
Uqhubekele phambili wathi abantwana laba babedlala kwasekuqhunsuka intambo umuyi waseyithatha wazibopha entanyeni wasesithi uzajinga ngalindlela yikho ukuthatha intambo ezibopha ngayo entanyeni esithi uyajinga ngayo injalo kanti elokufa kalitsheli sokuzaba yikufa kwakhe.
“Abantwana laba babedlala bejinga intambo yasiqamuka lo osengumuyi wayidobha ethi yena uyajinga ngayo kunjalo kanti sokuyikutshiya kwakhe amabele.
“Silesithuli ngesiga lesi ngoba loba ngisithi ngiyakuhluzisisa angikaze ngiyizwe ingozi enje, kukhanya wahlungwa umntwana lo. Umntwana oleminyaka engaka kunzima ukuthi enze into enje icine imcitsha umphefumulo, phela abantu balomona labantwana babantu,” kulandisa umfakazi oqotho.
Isikhulumi samapholisa esabelweni seMatabeleland South u-Inspector Ndebele ebuzwa ngodaba lolu uvumile wathi solufikile ehofisini labo njalo abantu ngazo zonke izikhathi kumele babone ukuthi abantwana bavikelekile.
“Udaba lomntwana ozibophele ngentambo abejinga ngayo solufikile ehofisini lethu kungakho-ke sithanda ukukhuthaza uzulu ukuthi enze isiqinisekiso sokuthi abantwana bavikelekile ngaso sonke isikhathi ukuze kuvikelwe ingozi ezifana lale,” kuphetha uInsp Ndebele.
