uMthunywa
Thokozile Mbedzi
KULOMNTWANA oleminyaka emithathu wesigabeni seLesanth Matshiloni eBeitbridge ofe ngemva kokuwela edibha ngeSonto.
Umntwana lo, uOnious Baloyi oleminyaka emithathu yokuzalwa kubikwa watshiywa ngugogo wakhe edlala labanye aze awele edibha.
Kubikwa abantwana laba babedlala eceleni kwedibha, umntwana wasesuka waya edibha abanye bengamboni ngokusweleka kwenhlanhla wawela phakathi.
Ekhuluma lentatheli kaMthunywa uNkosazana Maline Moyo uveze ukuthi lokhe bedabukile ngesiga lesi.
“Ugogo womntwana wabatshiya bezidlalela labanye abantwana. Njengoba bonke babebancane kabazange bananzelele ukuthi uOnious uqonde ngaphi baqhukela phambili bezidlalela.
“Ugogo wakhe uthe ephenduka wasebuza ukuba umntwana ungaphi bona bathi kabakwazi. Wasebiza izakhamizi zahle zaqala ukudinga sabona inyawo zakhe ziqonda edibha sazilandela sabona ukuthi zicina edibha kanye njalo kazidlulanga lapho. Sasesibizana sakhupha amanzi wonke edibha lakanye samthola phakathi. Sabikela amapholisa ngodaba lolu,” kulandisa uNkszn Moyo.
Isikhulumi samapholisa esabelweni seMatabeleland South uAssistant lnspector Thabani Mkhwananzi ebuzwa ngodaba lolu uthe solufikile ehofisini labo ngakho uzulu kananzelele abantwana ngaso sonke isikhathi nxa bedlala.
“Uzulu kananzelele abantwana ngaso sonke isikhathi njalo betshiye abantwana belomuntu omdala obakhangeleyo ukuze kuvikelwe ingozi,” kuphetha uAsst lnsp Mkhwananzi.
