uMthunywa
Ethel Ncube
KWEHLE iyezi elimnyama kwenye imuli eKennilworth eNyathi ngemva kokucatshelwa ngumntwana andubana atholakale esedlule emhlabeni njalo edlwenguliwe.
Indaba le yenzakale ngeviki ephelileyo lapho umetheswacala ongumfana oleminyaka engu-17 yokuzalwa edlwengule uNokukhanya Mthethwa oleminyaka engu-8 yokuzalwa.
Kuvele ukuba umuyi uNokukhanya Mthethwa wacatsha mhlaka 21 kuMfumfu kuwonalo umnyaka ngesikhathi esesikolo. Kubikwa wasuka engoya esambuzi wangaphenduki ekilasini okwenza umbalisi wakhe wacabangela ukuthi mhlawumbe usebuyele ngakibo. Kuthe ilanga litshona umama womntwana wabuya kumbalisi ezobuza umntwana, wasebikelwa ukuthi uphume engoya ngaphandle wangaphenduki.
Umama womntwana wasuka lapho wamcinga esigabeni andubana ayebikela amapholisa aqala ukuncedisa ukumdinga.
Ulnspector Glory Banda
Mhlaka 27 Mfumfu izakhamizi zeLongwe, eNyathi zaphuma ijumo zadinga egangeni zathola umntwana egangeni esefile. Amapholisa abikelwa, kwaphuma amapholisa eNyathi kanye labogatsha lweCID Lupane enza ucwaningo okwabangela ukuthi kucine kubotshwa umfana oleminyaka yokuzalwa engu-17.
Lumfana ongumsolwa kubikwa ubikele amapholisa ukuthi yena wahlangana lomuyi efohla ecingweni lwesikolo wasemdonsa wamtshaya ngamatshe qede wamdlengulwa wathi eqeda ihlazo leli wananzelela ukuthi umntwana wayengasaphefumuli kumbe ukunyikinyeka wamtshiya enjalo.
Iphephandaba likazulu lixhumane lesikhulumi samapholisa eMatabeleland North uInspector Glory Banda oveze ukuba udaba olunjalo balutholile.
“Amapholisa achwayisisa ngesehlakalo lapho umfana oleminyaka engu-17 adlwengula wabulala uGrade 1. Sikhuthaza uzulu ukuba ahloniphe impilo yomuntu,” kubika uInsp Banda.
