uMthunywa
Thokozile Mbedzi
ZILOKHU zinkemile izakhamizi zeMabuthweni koBulawayo kulandela ukuzwa ngomntwana oleminyaka engu-11 yokuzalwa okubikwa uzibophele wafa ngempelaviki esola ukukhuzwa.
UPatience Happiness Chishemu oleminyaka engu-11 yokuzalwa njalo obesenza uGrade 5 eMpumelelo Primary eMpopoma uzibophele wafa ngemva kokukhuzwa ngunina.
Omunye umakhelwane okhulume lentatheli kaMthunywa uJulia Nkala uthe lokhe elesithuli ngesenzo somntwana lo.
“Silesithuli silapha njengabomakhelwane sizibuza imibuzo eminengi engadingi impendulo. UPatience besingacabangeli ukuba angenza isenzo asenzileyo.
“Umntwana lo, unina wayethe amphathele ukudla yena wasuka wadlala labangane wakhohlwa, unina uthe ephenduka wamtshaya ngophini esola isenzo sakhe.
“Lokhu kukhanya akuzange kumphathe wathi uyahlutshwa. Unina wabuyela ezitolo lapho athengisela khona wamtshiya uthe elokhu ekhonale wezwa abanye abantwana sebesithi usezibophele,” kuchaza uNkszn Nkala.
Indaba le yabikelwa amapholisa.
uAssistant Inspector Nomalanga Msebele
Isikhulumi samapholisa koBulawayo uAssistant Inspector Nomalanga Msebele ebuzwa ngodaba lolu uvumile wathi solufikile ehofisini yabo.
“Udaba lomntwana ozibulale ngemva kokuba ebe lokungazwisisani lonina solufikile ehofisini yethu.
Unina kaPatience watshiya emlaye ukuthi amphathele ukudla ezitolo zeMabuthweni lapho athengisa khona i-gas yena wangakuhambisi. Unina wamtshaya ngophini kanengi enyaweni esemtshayile wasuka wahamba, uthe ngehola lesibili emini walandwa ngabanye abantwana bemtshela ukuba uPatience usezibophele esihlahleni esincane se-apula ngentambo.
Unina wafika wamkhulula esihlahleni wangena laye endlini kodwa abemota yezigulane bathe befika bathi usedlule emhlabeni.
“Amapholisa akhuthaza uzulu ukuba kananzelele ukuziphatha kwabantwana ukuze babaqondise kusesemasinyane ukuze benqabele izinqumo ezifana lalezi,” kuphetha uAsst Insp Msebele.
