uMthunywa
Charity Moyo
IZAKHAMIZI zesiqintini seSowondo eMawabeni sezisole umlimisi wesigaba sikaWadi 12 owabanjwa ezama ukuntshontsha izamende zephurojekithi yenhlanzi, uMthunywa ukuzwile lokhu.
Kuvele ukuba izamende lezi zaphiwa abantu besigabeni seSowondo ukuze kusungulwe iphurojekithi yenhlanzi yinhlanganiso yeWorld Vision.
Kucatshangelwa ukuba uMike Matanike ongumlimisi kuWadi 12 wabanjwa kunyanga ephelileyo ezama ukuntshontsha izamende lezi.
Kuzwakale ukuba umlimisi lo wahamba ngemota emzini lapho okuhlala khona izamende lezi wakwatula isivalo esasikhiyiwe kodwa waficwa ngabantwana bakulowomuzi ezama ukuzitshontsha.
Okunye okungaphathi kuhle izakhamizi zalesi sigaba yikuthi umlimisi lo ulamabizo amanengi. Kucatshangelwa ukuba nxa umlimisi lo eseSigodini ubizwa ngokuthi nguMike Matanike kukanti nxa eseKumbudzi ubizwa ngokuthi nguZibiza Dube.
Ekhuluma lentathelizindaba uMnumzana Christopher Sibanda uveze ukuthi isenzo sikaMatanike lesi sicunule isigaba sonke njalo abantu kabasamthembi.
“Kwabizwa ukhansila izakhamizi zaveza ukuthi kazisamfuni umlimisi lo esigabeni sabo,” kutsho uMnu Sibanda.
Esinye isakhamuzi esasikulo umhlangano sibikele uMthunywa ukuthi uMatanike wavuma icala lakhe njalo wacela uxolo.
UMthunywa wenelisile njalo ukukhulumisana lokhansila kaWadi 12 uMnumzana Elliot Dube yena oveze ukuba kuliqiniso lokhu njalo bake bahlala phansi lomlimisi lo bakhuluma laye kodwa wacela uxolo.
“Kuliqiniso ukuthi umlimisi wethu bamkhanda ezama ukutshontsha kungakho sike saba lomhlangano labantu besigaba kanye laye uMatanike, wacela ukuthi abantu bamxolele kodwa abantu bathi kabasamfuni esigabeni,” kutsho uKhansila uDube.
Imizamo yokukhuluma lomlimisi uMatanike yehlule ngoba ubengadobhi ucingo lwakhe kwaze kwafika isikhathi sokudindwa kwephephandaba.
