uMthunywa
Innocent Kurira
KULINDELEKE ukuthi intshantshu zokugijima amabanga amade kuleli zincintise kumjaho weLiquor Hub Fun Run le-Charity Walk koBulawayo ngeSonto ekuseni.
Umncintiswano lo uyi-10KM njalo usekelwa ngusomabhizimusi omkhulu kulelidolobho uRaj Modi.
Amalungiselelo omjaho lo kubikwa asezingeni eliphezulu ngokutsho kukamgcinisihlalo weBulawayo Athletics Board (Bab) uWatson Madanyika.
Uthe lonyaka bakhangelele ukuthi umjaho ubemkhulu ngoba kuzancintisa abagijimi abaziwa bezintshantshu kuleli njalo bakhona abanye abachinsa ukuncintisa abavela kuzabelo zonke zelizwe.
Intshantshu zomjaho nyakenye u-Olivia Chitate loWellington Vaveri bazafuna ukuthi bamphinde umphehlo, bavimbe izicoco zabo.
“Sijabule kakhulu ngokuthi umjaho lo, oqakatheke kakhulu kithi, usukhona. Abagijimayo lokhe bebhalisa ngobunengi babo. Lonyaka kuzafiwa ngomncintiswano ngenxa yokuthi kuzabe kulengcitshi, ezaziwa njengentshantshu kumdlalo wokugijima kuleli,” kutsho uMadanyika.
Uthe bakhangelele lokuthi kuzagijima lentshantshu ezibalisa uAnnie Chirisa, Nkosiyazi Sibanda, Ngonidzashe Mpofu lo-Isaac Mpofu.
Inhlanganiso yeBab ihlose ukuthi ikhulise umdlalo wokugijima koBulawayo njalo ukuze ifeze lokhu kumele ithole usekelo lwemali. Ngokunjalo, uMadanyika ubonge usekelo oluvela uRaj Modi lamabhizimusi akhe.
“Sikhangelele ukuthi sibelomjaho ozaqhuba kuhle. Sibonga kakhulu kubaxhasi bethu ngokuqhubeka ngosekelo. Sijabule kakhulu ngoba umxhasi wethu uthembise ukuthi ngomnyaka ozayo umjaho uzawenza ube yi-21km,” kutsho uMadanyika.
Ngomnyaka odluleyo, uChitate, ogijima engaphansi kweZimbabwe Republic Police watshaya intambo ngomzuzu we-36, 18 kuqula labesifazane.
Walandelwa nguCaroline Mhandu oweZimbabwe Prisons and Correctional Services, ngomzuzu we-36, 46.
Kwabesilisa, uVaveri oweBlack Rhinos wanqoba ngomzuzu we-28,40. Enye intshantshu kwezokugijima uMunyaradzi Zizhou owe-Blanket Mine waqeda ekunombolo yebili nge-28, 44.
Kulabo abafuna ukuncintisa kumbango we10km, kubikwa kumele babhadale i-US$5.
UMadanyika wazise umphakathi ukuthi imali ezatholwa kulumncintiswa izanikezwa abadala abagcinwe endaweni ezehlukeneyo koBulawayo kunye lokuphathisa abantwana abahlutshwa ngumkhuhlane wenhliziyo.
“Yonke imali ezatholwa lapha izaphathisa kakhulu abadala. Kungumbono womsekeli wethu uRaj Modi nanko ngomnyaka odluleyo wathengela abantwana ababili amatikiti endizamtshina ukuthi bayelatshwa e-India.”
