uMthunywa
Charity Moyo
ZISELE zikhuza imihlola izakhamizi zeLutumbu eBeitbridge ngemva kokuba enye indoda imithise umntakamnewabo andubana izibophele.
Isiga lesi senzakale ngoMgqibelo kuviki ephelileyo.
Umuyi oleminyaka engu-37 kubikwa wamithisa umntakamnewabo oleminyaka yokuzalwa engu-18.
Udaba lolu lwavela ngesikhathi unina womntwana kanye lezinye izihlobo sezinanzelele ukuthi wayesemi kubi kungakho zasezisithi kachaze ukuba lowomthwalo wayewuthethe ngaphi.
Umfakazi obikele uMthunywa uLivias Ngwenya uveze ukuthi umuyi ubeselesikhathi egila umkhuba lomntakamnewabo emacansini okuyikho okwenza wazithwala.
Uveze ukuthi andubana kubonakale ukuthi umntwanalo wayesezithwele umuyi wazama ukuthi bakhiphe umthwalo lo kodwa kwehlula.
“Umuyi wake wazama ukudinga abantu abakwazi ukukhupha izisu kodwa kazange abathole, kuthe ngesikhathi umntwana echaza ukuthi umthwalo ngokayisomncane waswela ukuthi angene ngaphi wahle wayazibophela,” kutsho uMnu Ngwenya.
Kuvele ukuthi ngelanga intombi eyaveza ngalo iqiniso umuyi kabonakalanga ngakho umdeni wahlala phansi wavumelana ukuthi babezahlala idale bazwisise iqiniso.
Kuzwakale ukuba abantu belokhu besakhulumisana ngokuthi kuthiweni ngalindaba eyayisibatshayanisa amakhanda kwezwakala ukuba umuyi wayesezihilele emkulwini.
UMthunywa uxhumane lesinye isihlobo sikamuyi, uMnumzana Daniel Nyandoro oveze ukuthi imihlola ibuye yabagubuzela emzini wabo.
Uqhubekele phambili esithi yena ubengakukhangelelanga ukuthi umnewabao engenza ihlazo elinje ngoba umntanakhe laye ngowakhe.
“Umntwana eveza ukuthi umthwalo ngokayise omncane kangizange ngikukholwe ngoba ngisithi ucatsha ngomunwe,” kuchaza uMnu Nyandoro.
Uveze ukuthi umuyi watshiya ebhale incwadi esithi uyaxolisa ngesenzo sakhe ngakho ubone kungafanelanga ukuthi aphile emphakathini ngenxa yesenzo sakhe.
Isikhulumi samapholisa esabelweni seMatabeleland South uInspector Philisani Ndebele uthe udaba lolu kabakalwamukeli.
“Besingakalwamukeli udaba olunje, sizachwayisisa ngalo,” kuphetha uInsp Ndebele.
