uMthunywa
Langelihle Moyo
KULENDODA yeLupane emiswe phambi komthethwandaba wakule indawo ngoLwesithathu ngeviki ephelileyo isetheswa icala lokubulala umkayo ngoba ingafuni ukwaliwa.
Kubikwa uNkosiyabo Msipha oleminyaka yokuzalwa engu-26, wesigabeni seManasa, eLupane ngaphansi kwenduna uMabhikwa wabulala umkakhe, uDuduzile Ndlovu ngomnyaka ka2020 ngoba engafuni ukwaliwa.
Umantshi weLupane uNkosazana Barbra Ntabile Phiri uzwe ukuba mhlaka 19 Mbimbitho ngomnyaka ka2020 uMsipha wayelomkakhe owamtshela wathi usefuna behlukane yena wala, wasembulala andubana abaleke ayehlala eNyathi.
Umtshutshisi uMnumzana Clive Gumbo ulandisele inkundla ngodaba lolu. Uveze ukuthi ngalelolanga ekuseni umsolwa wasuka loyise baya kwabozala lomkhongi wakhe esigabeni seSemvubu, eLupane.
Kubikwa umkamsolwa wayengakibo ngaleso sikhathi. Uyise kamsolwa wabuza umalukazana wakhe ukuthi engabe esafuna ukubuyisana lomkakhe kodwa umalukazana walandula okuyikho okwahle kwacunula umsolwa wasukuma waqala ukuthetha ethi uzambulala.
Uyise kamsolwa esizwa lokhu wathi lothu waphuma waqonda emzini wakhe engatshongo lutho.
Kubikwa uNdlovu wasukuma esefuna ukuphuma emkulwini kodwa umsolwa wamdonsa wambamba ngekhola. Unina kamuyi lomkhongi bazama ukuthi badonse umsolwa ukuthi angamkhami, kodwa kazange akutshaye indiva lokhu, waqhubeka embambile ngapha edonsa ihloka elalingemva kwesivalo.
Umsolwa wathi ethi aphakamise ihloka ahlahlele uNdlovu, umnawakhe owayepheka phandle weqa ezama ukuthatha ihloka kodwa umsolwa wasukuma wamgijimisa.
Khonokho watshibilika wadobha insimbi eyayamiswe emdulwini, efuna ukutshaya ngayo uNdlovu kodwa wagijima wayacatsha ngemva komkhongi wakhe laye owatshaywa kanye ngaleyonsimbi ehlombe. Wabuye wabaleka wayacatsha ngemva kukanina laye bamtshaya ngensimbi efanayo ngumsolwa.
Esebona ukuthi bonke ayecatsha ngemva kwabo sebatshayile wahle wasusela uNdlovu amanqe wamtshaya kanye ngensimbi ekhanda andubana aqhubeke emtshaya umzimba wonke.
UNdlovu kubikwa wafela esibhedlela seSt Luke’s.
Umetheswacala uzabe evalelwe esitokisini, uzamiswa njalo mhlaka 13 Mbimbitho.
Umantshi umkhuthaze ukuthi abhalele emthethwandaba weHigh Court ukuze athole ibheyili.
