uMthunywa
Cornelius Luphahla
NGENXA yendlala kube yisisanasana ubukhwa bezinja ensimini yesinye isakhamuzi lapho amanina amabili esigabeni seMadojwa eLupane abhuqane kwabaluthuli elinye inina lahlephuna elinye amakhala kubangwa ukuthi omunye ubesetshontshele omunye amajodo.
Impi le yenzakale ngoMvulo kuyonale iviki lapho uNkosazana Belinda Moyo adindane khona loNkosazana Thandekile Mathe waze wamnkankila amakhala wamkhipha iqatha bebanga amajodo ensimini kaNkosikazi Siphiwe Magutshwa.
Kuzwakale ukuthi uNkkz Magutshwa ubelime amajodo amanengi kakhulu okudale ukuthi ngemva kokuthatha ayewafuna ubize omakhelwane bakhe ukuba bezothwala labo njengoba kuyindlala.
Kubikwa uNkszn Mathe watshiya amajodo akhe ewabuthelele ensimini le esiyabopha inqola wathola uNkszn Moyo esewatshontshile watshiya amalutshwana ukuyikho okwadala impi le.
Ekhuluma loMthunywa uNkosazana Mevis Ndebele uchaze ukuthi uNkszn Moyo nguye owaphambanisayo.
“Mina ngangikhona mhla amanina la esilwa njalo uMaMoyo nguye owaphambanisayo ngoba wathola amajodo kaMaMathe ebuthelelwe wafika wawatshontsha watshiya amalutshwana. Kuthe ngesikhathi uMaMathe efika esezothatha amajodo akhe ngenqola wathola kusele amahlanu kuphela.
“Into eyadala ukuthi balwe yikuthi ivili lenqola kaMaMoyo kanye lenyawo zakhe kwakulokhu kukhanya. Isimanga yikuthi wathi embuza ukuthi kungani ethethe amajodo akhe wala wamthethisa wamthembisa ukumtshaya ethi ubevele ewatshiyelani amajodo akhe esazi ukuthi bakhona abawafunayo. UMaMathe wathi ezama ukuphendula uMaMoyo wahle wamsukela ngempama okuyikho okwaqala khona umsindo lo uMaMoyo watshaywa waze waluma uMaMathe wamhlephula amakhala,” kulandisa uNkszn Ndebele.
Ebuzwa ngale indaba uNkszn Moyo uchaze ukuthi yena wayengazimiselanga ukulimaza umakhelwane wakhe kodwa kwaba yingozi.
“Mina ngangingazimiselanga ukulimaza umakhelwane wami kodwa isilingo lesi sangehlela kuphela. Yebo sibili amajodo akhe ngangiwathethe kodwa ngangingakwazi ukuthi ngawakhe ngangithi kumbe lawo atshiywa nguMagutshwa.
“Njengoba esesibhedlela uMaMathe kodwa engabuya ngizazama ukuyamxolisa kumbe ngimbhadale ngoba ngamphambanisa kakhulu,” kutsho uNkszn Moyo.
Usobhuku wakule indawo uMnumzana Danisa Ncube ubikele intatheli ukuthi indaba le uyayazi noma nje isemapholiseni.
“Indaba yokulwa kwezakhamizi zibanga amajodo yafika kimi kodwa kangizange ngayithonisa ngoba isezandleni zamapholisa,” kuphetha uMnu Ncube.
