uMthunywa
Wayne Ncube
KULOMFUNDI weLupane State University ovele phambi kwenkantolo yeTredgold ekhangelane lecala lokweba impahla ezibiza imali engange $2 000 ezitolo zakoEdgars lakoJet, koBulawayo.
UCharity Ndlovu oleminyaka engu29 yokuzalwa uwavumile amacala akhe okutshontsha phambi kukamantshi uLizwe Jamela ngoLwesibili lweviki ephelileyo.
Umthethwandaba uhlawulise uNdlovu imali engange $400 kumbe abotshwe okwenyanga eyodwa.
Kubikwa ukuba mhlaka 18 Zibandlela uCharity Ndlovu ohlala elokitshini leMagwegwe wangena esitolo sakoEdgars esiku (9th Avenue loJason Moyo Street, watshontsha i-slack jacket formal le-slack trousers le-formal skirt waphuma engananzelelwanga lempahla lezi ezibiza i$1 800 eziphinde zatholakala esebotshiwe.
Umthethwandaba uphinde waziswa ukuba ngalelo langa uNdlovu waqhubeka waya koJet Stores okuLeopold Takawira loJason Moyo Street wayatshontsha izicathulo zohlobo lwama-pumps ezibiza $200.
Kwavela ukuba lapho eselanda ukuyaphuma emnyango lempahla kwakhala ama-alarm emnyango wabanjwa ngumantshingelane weSafe Guard Security uMnumzana Joseph Chingira.
Wakhuthuzwa, yikho lapha okwatholakala impahla zakoEdgars lazo zaphindiselwa emuva esitolo kulandela ukubotshwa kukaNdlovu.