uMthunywa
Thokozile Mbedzi
ZIKHUZA umhlola izakhamizi zesigabeni seSt Luke’s bucwadlana leLupane ngemva kokuba omunye umfundi obefunda uFomu 3 etshaywe yinkosazana esemkulwini wafa.
Isiga lesi senzakale ngeSonto kuyonale iviki lapho umfundi wesikolo seZwangendaba Secondary uWizzy Ngwenya ovela esigabeni seMathambo atshaywe khona yinkosazana esemkulwini kaMnumzana Thamsanqa Mafu lapho abecelelwe khona indawo yokuhlala ukuze abeseduzane lesikolo.
Kuzwakale ukuba umfundi lo esetshaywe lizulu umkulu abekiwo lawo uhle watsha waphela.
Izakhamizi ziveze ukudana okukhulu ngalimpicabadala bethi izulu lakhona kalinanga okuyangaphi.
Ekhuluma loMthunywa uNkosazana Samukelo Ncube oyisihlobo sakoMafu uveze ukudana ngesehlakalo esimehlelayo.
“Indlela luntombazana adlule ngayo iyethusa kakhulu njalo silokhu singakukholwa okwenzakale lapha.
“Okungimangalisa kakhulu yikuthi umntwana lo ubesanda kufika evela ngakibo njengoba efunda ehlala khonapha,” kutsho uNkszn Ncube.
Uqhubekele phambili waveza ukuthi umuyi wafika esenethiwe wasezama ukuphemba umlilo ukuze akhudumale aze ehlelwe ngamashwa la.
UMnumuzana Thabani Ndlovu oyisihlobo somfundi lo uveze ukuthi bazama ukuthwalela umntwana lo esibhedlela la mashwa esanda kwenzakala ngethemba lokuthi umntwana uzasila kodwa kwehlula.
“Sazama ukugijimisela umuyi esibhedlela seSt Lukes kodwa wayevele esedlule,” kutsho uMnu Ndlovu.
Umuyi kubikwa ubekwe ngoLwesibili kuyonale iviki.
Omele isikhulumi samapholisa esabelweni seMatabeland North uAssistant Inspector Eglon Nkala uthe kabakawamukeli umbiko lo.
