uMthunywa
Ethel Ncube
Kulomfundi weSilobela ocathamele omunye wambulala kubangwa intombi ngeviki ephelileyo.
Umfundi lo kubikwa wabona omunye ehamba lentombi yakhe wakhulelwa yibukhwele wayabachathamela phezulu kwesihlahla esisendleleni andubana amjikijele ngesikhali esingaziwayo ekhanda wafa.
Ekhuluma lentatheli induna yakule indawo uMalisa iveze ukuba ibikelwe ngabafundi laba.
“Ukubulalana kwabantwana kuyanda endaweni yethu okuyinto esikhathazayo thina njengobukhosi bomdabu.
Kulendaba le yabafana ababili abafundayo okubikwa omunye ucine ebulawa ngomunye kubangwa intombi.
Lokhu kusikhathazile kakhulu ngoba le ayisiyo ndaba yakuqala ukwenzakala esigabeni.
Ngokutsho kwabantu umfana lo wakhwela esihlahleni wachathamela omunye wathi ephezulu wamtshaya wawela phansi indlebe ivele isivuza igazi wamphinda futhi esewele phansi.
“Umfana lo owahlaselwayo wathwalelwa esibhedlela lapho afika wadluliselwa esibhedlela seGweru ngokuswelakala kwenhlanhla wedlula emhlabeni esendleleni.
Ngidabukile kakhulu njengomkhokheli wakulindawo ngesehlakalo lesi. Abantwana kumele bafundiswe ukuthi umphefumulo womuntu uyahlonitshwa hatshi ukudlala ngempilo,” kubika induna uMalisa.
Chief Malisa
UMthunywa uxhumane lesikhulumi samapholisa eMidlands uInspector Emmanuel Mahoko oveze ukuba indaba enjalo ifikile endlebeni zakhe.
“Indaba enjalo yabikwa kithi, umuyi kubikwa waba lesilonda esitshonayo ngemva kwekhanda wahanjiswa ekilinika wasedluliselwa kwesinye isibhedlela lapho afika watshona khona ngelilandelayo.
“Sisachwayisisa ngodaba lolu, umetheswacala wadliwa ngumswenya.
“Besicela ongabe elolwazi lwalapho angabe ekhona abikele amapholisa aseduzane laye,” kuphetha uInsp Mahoko.
