uMthunywa
Thokozile Mbedzi
KULOMFUNDI wakoBulawayo okubanga likaFomu 4 otshaye ujaha oleminyaka engu-18 ngesitina indlebe wafa.
Umfundi lo, ohlala eLobengula West, koBulawayo oleminyaka engu-16 esingeke saqamba ibizo lakhe ngenhloso yokumvikela kubikwa ubulele uSiphamandla Mpofu oleminyaka engu-18 ngokumtshaya ngesitina ngenyanga kaMpalakazi nyakenye.
Ekhuluma lentatheli kaMthunywa uAssistant lnspector Nomalanga Msebele uthe kulomfundi oleminyaka engu-16 othe ebona lo osedlule emhlabeni wadobha isitina wamtshaya ngaso endlebeni yesandleni sokudla kodwa kazange achaze isizatho sesenzo sakhe.
Uthe umetheswacala kunye lomuyi bonke bahlala elokitshini leLobengula West.
Kuvele ukuba umetheswacala owayelabangane bakhe ebona uSiphamandla esephansi wahle wacela ezinyaweni labangane bakhe.
Kubikwa uSiphamandla waze wancedwa ngenye indoda eyayisedlula eyabiza i-ambulensi ukuba imthwalele esibhedlela seMpilo ukuze athole ukwelatshwa.
USiphamandla kubikwa ngokusweleka kwenhlanhla wedlula emhlabeni mhlaka 11 Mpalakazi ngomnyaka ka2023.
Indaba le yabikelwa amapholisa ahle abopha umetheswacala.
“Amapholisa athanda ukuxwayisa uzulu ukuba kangaxazuli inkinga ngodlame ngoba kudala ukulahleka kwempilo mahlayana njengalokhu,” kuphetha uAsst Insp Msebele.
