uMthunywa
Thokozile Mbedzi
KULOMFANA wenkomo otshiye izakhamizi zakuVillage 4 eNyamandlovu zitshwaqe umzimba njalo zizonde zigane unwabu nanko phela uthe ngemva kokukhelela uMaGwebu wasukela umqatshi wakhe wamkhahlela andubana amtshaye langogodo ngapha ekhuluma amazwi engoma edla ubhedu kulezinsuku ethi Ngizakunanka SaMaMoe.
Isiga lesi esenzakale ngeviki ephelileyo siyindaba esegudwini kulindawo nanko phela umetheswacala owaziwa ngokuthi nguPerfect kukanti abangakibo bafike baveza ukuthi nguFikile (21) enze lelihlazo phezulu kwalokho wakhuluma ekloloda ethi “unanke uma-o’lady wabhora (ngimtshaye wafa),” kodwa okubangele ukufa kwakhe yikuthi ubevele ezigulela.
Umuyi uBuhle Moyo (43) obekwe ngoLwesithathu kubikwa uhlangane lometheswacala entubeni andubana amsukele amtshaye ethi kabuyele endlini.
UMthunywa uxoxisane loWashy Moyo onguye owafika ehamba lometheswacala bevela etshwaleni ngehola lesibili emadabukakusa wabikela intatheli ukuthi bathi befika ekhaya bahlangana lalo osengumuyi ethwele imitshaqana ethi uya edolobheni.
“Sathi sivela etshwaleni sahlangana loBuhle ethwele imitshaqana ethi uya edolobheni uFikile wahle wamsukela wamkhaba njalo wamtshaya ngogodo.
“Mina ngamtshiya kodwa emtshaya ngayalala, angikwazi okwasala kusenzakala,” kulandisa uWashy.
UMthunywa uxoxisane njalo loKhumbulani Ncube (PICTURED) ongumfowabo kamuyi wathi bezwa sebevuswa ngumntwana ekuseni ethi kababuye bazobona uyisekazi ngoba utshaywe nguPerfect.
“Mina ngabizwa ngumntwana ekuseni esithi sizobona uyisekazi ngoba unankwe nguPerfect njalo kasavuki.
“Ngathi ngifika entubeni yomuzi ngabona igazi lwahle lwangitshaya lwangeqa uvalo ngatshibilika ngayabiza omakhelwane.
“Sifika labomakhelwane sathola kugcwele igazi yonke indawo njalo udadewethu wayevuvuke esesabeka ikhanda lomzimba wonke nje. Sathi silalela ukutshaya kwenhliziyo sabona ukuthi usethule njalo useqanda,” kulandisa uMnu Ncube.
Kuzwakale ukuthi umetheswacala esebulele uBuhle wabiza umntwana oleminyaka engu-10 ukuthi amncedise ukumthwala amuse endlini kodwa wacina esemhudula.
Uqhubekele phambili wathi babuza uPerfect (Fikile) ukuthi kwenzakaleni waphendula ekloloda ethi ‘‘ubemnanka’’.
“UPerfect sathi simbuza ukuthi kwenzakaleni wathi ubemnanka manje usebhorile laye kasakwazi ukuthi kwenzakaleni.
“Waqhubekela phambili esithi uvele uma-o’lady yikuthi ubezigulela yikho esebhorile,” kutsho uMnu Ncube echiphiza inyembezi.
Amapholisa abikelwa ngesiga lesi ahle abopha umetheswacala.
Uyise kamuyi uKephasi Mhlupheki Moyo obekhanya ehlulukelwe uthe ubonga omakhelwane ngomsebenzi abawenzileyo ngoba bona bebekhatshana.
“Kangilawo amazwi amanengi ngokwehlele indodakazi yami kodwa ngithanda ukubonga omakhelwane bami ngomsebenzi abawenzileyo ukubikela amapholisa lokubona ukuthi isikliwi esibulele umntanami siyabotshwa,” kutsho uMnu Moyo echiphiza inyembezi.
Ukhansila wakule indawo uSifiso Moyo uvumile ukuthi kulesiga esinjalo esehlele isigaba sakibo.
“Kuliqiniso sibili ukuthi kulojaha obulele inina elileminyaka engu-43 ehlabela ingoma ethi ngizakunanka.
“Umfana lo wazama ukufihla impahla ezazigcwele igazi kodwa lezompahla zabonakala amapholisa esefikile,” kutsho uKhansila uMoyo.
“Umfana lo wathi ekhuluma ngokunanka kanye lokubhora saswela ukuthi ukhuluma ngani yikho nje saze sabiza amapholisa njalo lekufikeni kwawo amapholisa kazange ale ukuthi ‘umnankile’ wahle wawatshela okuyikho okwenza bamfaka insimbi,” kutsho uKhansila Moyo.
Imizamo yokukhulumisana lamapholisa esabelweni seMatabeleland North yehlule.
