uMthunywa
Thokozile Mbedzi
NGENXA yokuthanda inyama kulomfana weMakhado eBeitbridge ogalule ezama ukukhipha ibhalabhala ebelingene phakathi kwedamu, uMthunywa ukuzwile lokhu.
UAdvance Ndlovu oleminyaka yokuzalwa engu-17 ugalule ezama ukukhipha ibhalabhala ebelingene phakathi kwamanzi libalekela izinja.
Kubikwa uNdlovu wangena phakathi kwedamu uMagwamasi lomunye umngane wakhe bazama ukudonsa ibhalabhala leli kodwa umngane wenelisa ukuphuma emanzini esebona ukuthi umngane wakhe usegalule.
Ekhuluma lentatheli kaMthunywa ukhansila wakulindawo uMnumzana Amon Ndou uthe lokhe elesithuli ngojaha lo ogalule emanzini.
“Njengomphathi ngizwa ubuhlungu ngesiga esisehleleyo lapha njalo umfana lo ogalulileyo ngumzukulu wami. Umngane wakhe osinde engozini le uthi kwaqhamuka ibhalabhala lixotshaniswa yizinja lawela edamu.
“Uthi uMnumzana Gibson Muthumuni wasesithi bangene ngoba bona bengabafana bakujwayele ukubhukutsha, lakanye bangena kodwa ngokuswelakala kwenhlanhla uAdvance wagalula ngesikhathi ephakathi kwedamu.
“Kwabanzima ngoba kwabizwa abantu behluleka ukumsiza, kwacina kubizwa amapholisa, yiwo abuyayo ngoba sesehlulekile ukuba simthole. Izakhamizi zonke zilapha zilesithuli ngesiga lesi ngoba umfana lo ufe ngendlela ebuhlungu ngoba inyama akusinto ebimele ize ithathe umphefumulo wakhe,” kulandisa uMnu Ndou.
Omunye wezakhamizi uNkosikazi Sibongile Moyo uthe ulusizi ngoba kulomuntu omdala obekhona kusenzakala lokhu kodwa wehluleka ukweluleka abafana laba.
“Ngilusizi ngesiga lesi ngoba kusenzakala lokhu bekulomuntu omdala obemele axwayise abafana laba ukuba kuyingozi ukuba bangene edamu. Isimanga yikuthi uMnu Muthumuni uthe kabangene benze njengabafana ngoba abafana balezibindi ngakho kabaqine ukuze bathole inyama,” kutsho uNkszn Moyo.
UMlisa wakulindawo uMnumzana Liberty Muleya ebuzwa ngodaba lolu uvumile ukuthi lwenzakele.
“Udaba lomfana ogalule edamu lwenzakele, ngilusizi ngoba umfana lo obhubhileyo ubemncane njalo sikhangelele ukuthi yibo ikusasa lethu.
“Ngithanda ukuxwayisa uzulu ukuthi angangeni emadamu ngoba kuyingozi. Ngilethemba lokuthi ngeke sibe lobunye ubunzima obufana lalobu, sokungumlandu wakhe wonke umuntu ukuba sikhuthaze intsha ingangeni ezifuleni lemadamu,” kuphetha uMnu Mleya.
