uMthunywa
Ncekwenhle Ncube
ABATHI ‘‘umtanepholisa lipholisa’’ baqinisile.
Lokhu kugcwaliseke ngoLwesibili kuyonale iviki lapho omunye umtanepholisa ahambe le-teargas esikolo wafika wayiphosa ekilasini okubangele ukuthi abafundi bahitshwe.
Lindaba etshiye abazali abalabantwana abafunda eRobert Tredgold Primary School koBulawayo bezonde begane unwabu yenzakale ngoLwesibili lapho omunye umntwana (ibizo siligodlile) ofunda uGiredi 7 ehambe le-teargas esikolo wafika wayivula ekilasini okubangele ukuthi abanye abafundi babaleke baye phandle ngoba sebehitshwa.
Intatheli kaMthunywa ibikelwe ukuthi umfana lo ohlala eRoss Camp uloyise olipholisa njalo weba i-teargas le wahamba layo esikolo eyifake esikhwameni sakhe samabhuku.
Omunye umzali olomtwana ofunda kulesi isikolo ongathandanga ukubethwa igama uthe ubikelwe ngumntanakhe ukuthi umfana lo waqala wayivulela ephepheni andubana abangane bakhe bayithathe bayijikele phambili kwekilasi okule-black board khona.
“Umntanami uthe okuyinto lokhu okubahitshileyo kubuye lomunye umntwana ohlala eRoss Camp. Kuthwa ukufafazele phambili kwabanye abantwana ekilasini kwahle kwanuka okwenze baphuma bebaleka.
“Ngaleso sikhathi omunye umbalisi okutholakale ukuthi nguMnumzana Damba nje ufike ezokhangela ukuthi kwenzakalani ekilasini laye wehluleka ukungena ekilasini le ngoba umoya we-teargas lo ubusumhitsha,” kulandisa umzali lo.
Ubuye njalo wagcizelela ukuthi abazali bengagcini izinto eziyingozi endaweni ezingafinyelelwa ngabantwana. Uthe kusasa umntwana engabuya lombhobho adubule abanye esithi uyadlala.
UMnumzana Karen Ncube ohlala eCowdray Park olomntwana ofunda kulesi isikolo uchaze ukuthi umntanakhe kezwa kuhle kulandela ukuhitshwa ngalinto okucatshangelwa ukuthi yi-teargas.
“Ngikhuluma nje umntanami uvalekile isifuba kenelisi lokuphefumula kuhle kulandela ukuhitshwa kwakhe esikolo.
Kanti vele abazali babekelani izinto eziyingozi kangaka egcekeni?
“Sekuzakhanya sengathi isikolo sethu kasihlelekanga ngenxa yabazali abazenzisayo. Ngifisa abekhona emhlanganweni ozayo umzali walumntwana ukuze simtshele. Umuntu engathathi izinto zomsebenzi azigcine endlini yakhe,” kulandisa uMnu Ncube.
Umphathisikolo uNkosikazi Caroline Moyo uthe kuliqiniso ukuthi isehlakalo esinjalo senzakele esikolo sakhe njalo omunye wabazali bomntwana bambizile ukuzakhulumisana laye ngesenzo somntanakhe.
“Kuliqiniso sibili ukuthi abantwana bahitshwe ngomunye wabo besekilasini. Kuthe sekwenzakele lokhu safonela umzali womntwana ukuze sizokhulumisana laye ngesenzo somntanakhe.
“Sithanda ukuxwayisa abazali ukuthi izinto ezingaba yingozi bengazibeki lapho okufinyelela khona abantwana.
Kulakho ukuba yingozi empilweni zabasakhulayo,” kugcizelela uNkkz Moyo.
Isikhulumi samapholisa koBulawayo uInspector Precious Simango uthe udaba lolu kalukafiki endlebeni zakhe.
“Asikamukeli umbiko onjalo kodwa sizachwayisisa ngawo,” kuphetha uInsp Simango.
