uMthunywa
Cornelius Luphahla
ZIDIDEKILE izakhamizi zesigabeni seKana, eBinga ngemva kokuba omunye umfana wakule indawo exabane lomngane wakhe bebanga isilaha qede wanyamalala okucatshangelwa ukuthi nguye ombuleleyo.
Isiga lesi senzakale kuviki ephelileyo lapho umfana (14) olwe khona lomngane wakhe (12) ethi kungani ethethe isilaha sakhe obethiye ngaso amagundwane okucatshangelwa ukuthi umbulele wamfihla egangeni.
UMthunywa uxhumane loMnumzana Edwin Mudimba oyisakhamuzi sakule indawo walandisa ngesehlakalo lesi ethi kalankani ngaso njalo lokhu besadinga umfana ocatshileyo.
“Mina ngizwe umakhelwane wami ethi ulahlekelwe ngumntwana kodwa kuthwa ubesilwa lomngane wakhe bebanga isilaha. Ngalesosikhathi sahle sasuka saya ngakibo kamfana lo sambuza ukuthi umuse ngaphi umngane wakhe wathi kakwazi ukuthi ungaphi kodwa wavuma ukuthi ulwe laye bebanga isilaha.
“Ngemva kwalokho sahamba lomfana lo sidinga kodwa kasizange sambona lakhathesi lokhu simdinga. Mina ngokubona kwami uyabe wambulala wamfihla ngoba ngeke wanyamalala nje kungelalutho,” kutsho uMnu Mudimba.
Ekhuluma lentatheli uMnumzana Jethro Mpande uyise womntwana lo onyamalalileyo uthe uzwa ubuhlungu kakhulu ngomntanakhe njalo omcatshisileyo uzazibonela.
“Mina ngizwa ubuhlungu kakhulu ngokucatshelwa ngumntanami ngakho kangisoze ngihlale phezulu kwezandla mina ngehlelwe yisiga esingaka. Ngokunjalo olesandla ekucatsheni komntanami uzazibonela kanye lemuli yakhe. Noma kunjalo kangikadeli ukumdinga njalo kangikholwa ukuthi engabe wabulawa ngumngane wakhe kodwa kuyabe kulomuntu ogangileyo owamthathayo,” kutsho uMnu Mpande.
Umlisa wakule indawo uMnumzana Khandisi Donga ubikele intatheli ukuthi indaba le seyizwile ngakho ucabangela ukuthi kwenziwe ngumuntu lokhu ngoba akuqali ukwenzakala.
“Indaba yomntwana ocatshileyo sengiyizwile kodwa mina ngokubona kwami lokhu kwenziwe ngumuntu ogangileyo. Ngitsho ngoba akuqali ukwenzakala indaba ezimangalisayo lapha. Ekuqaleni komnyaka lo kwacatsha omunye umama wabonakala ngemva kwenyanga efile ethangweni lwensimu yakhe ngemva kokuba sesidinge abaphurofethi,” kutsho uMnu Donga.
Imizamo yokukhulumisana lesikhulumeli samapholisa esabelweni seMatabeleland North uInspector Siphiwe Makonese yehlule ngoba ucingo lwakhe kalubanjwanga muntu.
