uMthunywa
Ethel Ncube
Kulomfana oleminyaka engu-11 weMaboleni eLower Gwelo obhewulwe yinqola wafa ngeviki ephelileyo.
UMzingaye Teddy Ntini (11) kubikwa ubhewulwe yinqola evela ezitolo.
Kubikwa uNtandoyenkosi Ncube loMzingaye Teddy Ntini babevela ezitolo zeMaboleni behamba lomunye ngenqola ingakhokhelwanga. Kuzwakale ukuthi bathe besendleleni batshaya isidindi sesihlahla emgwaqweni inqola yahle yabhewuka.
Ngokuswelakala kwenhlanhla uMzingaye kubikwa yathi imbokotha yamtshaya ikhanda wahle wafa kukanti lo omunye wasinda.
Isikhulumi samapholisa eMidlands uInspector Emmanuel Mahoko ubike ukuba udaba olunjalo selufikile ezindlebeni zabo.
“Samukele indaba yomntwana oleminyaka engu-11 owabhewuka enqoleni wafa.
“Kuyadanisa ukuba kulahleke impilo yomntwana engozini le. Abadala kumele bahlale bekwazi ukuba kungumlandu wabo ukuba bavikele abantwana engozini efana lale njalo kumele babone ukuba inqola nxa zihamba ziyakhokhelwa,” kutsho uInsp Mahoko.
