uMthunywa
Christabel Matemera
KULOMCUPHI osebenzela esiteshi samapholisa eBinga owetheswa icala lokuqila inkampani ye-Econet Wireless Zimbabwe imali engange RTGS$2,5 million.
Econet
Umsolwa uBongani Moyo oleminyaka engu-34 umiswe phambi komthethwandaba weLupane ngoLwesibili esetheswa icala lokuqila inkampani ye-Econet imali.
Umtshutshisi kulelicala uNkosazana Zandile Laureen Ndebele ubikele inkundla ukuthi mhlaka 23 Zibandlela weluka icebo loKhulekani Ncube onguSecurity Officer.
Kubikwa umsolwa wathenga i-EcoSure Funeral Policy esebenzisa inombolo ezithi 0780356 964 ngebizo likayisemncane uFambeki Steven Moyo, wasembhalisa yena lendodana yakhe ukuthi yibo abazathola inzuzo.
Ecosure
Inkundla izwe ukuba umsolwa wagcina ilayini leli njalo ebhadala imali zakhona kwaze kwafika inyanga kaNhlangula. Kubikwa mhlaka 23 Nhlangula umsolwa waqonda enkambeni yamapholisa eJotsholo wafika waqamba amanga wathi umfowabo uMbongiseni Elphas Moyo ubhubhe mhlaka 16 Nhlangula kukanti yena wabhubha ngoNcwabakazi lonyaka. Lokhu wakwenza ngoba efuna iEcoSure claim form igcwaliswe athole imali.
Kubikwa incwadi leyo isigcwalisiwe umsolwa wayithumela abe-Econet esebenzisa ubulembu efuna ukuba abhadalwe.
Imali leyo yalungiswa yafakwa ebhukwini lakhe lebhanga le-Agribank umsolwa wazisebenzisela imali le ayithola ngobuqili.
Umantshi uNkosazana Karen Jeffrey kazange abuze umsolwa ukuthi uyalivuma loba hatshi icala lakhe kodwa udlulisele phambili ukuthoniswa kwalo kumhlaka 13 Mpandula.
