uMthunywa
NGEVIKI elizayo izikolo ziyavulwa, kuthemu yesithathu yomnyaka.
Kulesi isigaba somnyaka, yisikhathi esibaluleke kakhulu kubafundi abakumabanga okuloba imihloliso. Ngalesi isikhathi, kuhle ukukhumbuzana ukuthi abafundi badinga usekelo lonke oluvela kubazali, ababalisi lomphakathi jikelele.
Kulo lonke usekelo oludingwa ngabafundi, olubaluleke kakhulu ngoluvela kubazali. Nxa ungumzali olomntwana ozaloba imihloliso kunyanga ezilandelayo akube ngumlandu wakho ukwenza ukuthi umntwana akhululeke kumalungiselelo akhe emihloliso. Okumele kuhambe phambili kumalungiselelo la yinkuthazo.
Kungumlandu wakho mzali ukuthi umtshele umntwana ngezifiso zakho ngekusasa lakhe. Imfundo sonke siyazi ukuthi ilamandla angakanani okuvula amathuba empilakahle. Ngakho-ke, asibatsheleni abafundi ukuthi ukukhuthalela ezemfundo kuvula amasango. Akukho okunye okwedlula lokhu.
Ungabi ngumzali ocabanga ukuthi umsebenzi wokukhuthaza umntwana ngowababalisi. Bakhona phakathi kwethu abathi bengabhadala i-school fees bacabange ukuba sebeqedile. Hatshi, ayisikho.
Owathi umlandu wokukhuthaza abafundi uphelela kubabalisi wayelamanga. Umbalisi engenza umsebenzi wakhe, lawe mzali yenza owakho. Landelela konke okwenziwa ngumntwana kuzifundo zakhe, ukwenzela ukuthi mhla ehlala phansi eloba imihloliso, uzakwazi ukuthi lawe umfisela okuhle.
Umkhuba wokutshiyela wonke umsebenzi kubabalisi awuphele. Ukuphumelela komntwana ezifundweni kuqala ekhaya, lapho aphuma khona.
Lesi yiso isikhathi sokuthi abazali bananzelele okwenziwa ngabantwana, ikakhulu nxa sebevela esikolo. Indlela zokutaditsha zingabe zitshiyene kodwa lo oloba imihloliso kunyanga ezilandelayo kumele ahlale ephethe ingwalo zakhe. Kungumbono wephephandaba likazulu ukuthi abazali abaphakame, baqale ukukhuthaza abafundi ukuthi balungiselele imihloliso.
Abazali abacitshe izigxingi zabomabonakude, lakho konke, okugoqela imitshina yakulezinsuku exhumanisa abantwana kwezokuzithokozisa. Ubulembu abusetshenziswe ukutaditsha, hatshi ukuzithokozisa.
UMthunywa ukholwa ukuthi kungumlandu womuntu wonke ukuthi asebenzelane ndawonye ukuze abafundi benze kuhle esikolo.
Singabe siphila impilo ezitshiyeneyo kodwa umntwana akumelenga amelane lodubo ngesikhathi semihloliso. Kuyinjwayelo ukuthi abazali bathume abantwana, bebanika imisebenzi enzima efana lokudinga amanzi, ukutheza lokupheka, besazi ukuthi yisikhathi sokulungiselela imihloliso.
Pho umfundi uzabala nini ingwalo nxa uphethe umlayela lokhu lalokhuya?
Angeke waphumelela ngokufaneleyo umntwana ohlala enikwa imisebenzi yangekhaya, endaweni yokuthi ataditshe. Singakhuluma ngakho konke okudala ingqubekela phambili empilweni zabantwana kodwa angeke siphikisane ngokuqakatheka kwemfundo.
Tshiya umntwana abale ingwalo ngesikhathi semihloliso. Ziphathe njengomzali, lesi yiso isikhathi sokutshengisa umntwana ukuthi ibanga akulo libaluleke kanganani.
Kulilungelo labafundi ukuthi ngalesi isikhathi somnyaka, baphiwe amathuba okubala ingwalo zabo lokudinga ulwazi olungabasiza emihlolisweni.
Nxa usalawo amandla mzali, hamba uyethenga isinkwa semuli yakho. Yenza konke, uyedinga amanzi, weluse, upheke futhi. Uyekele umntwana athi ukuba seduzane lengwalo zakhe. Kwenze konke lokhu umkhuthaza, ulandelela indlela ataditsha ngayo.
Nxa kukhona angakuzwisisiyo ngezifundo uvunyelwe ukuthi ubuze ababalisi. Asingabi ngabazali abahlala bekhonona. Funda ukuba seduzane lombalisi womntwana.
Lokhu kuzancedisa kabanzi ukuze wazi isimo somntwana ngesikhathi eloba imihloliso. Lanxa engasoke abe lempumela enhle, lawe njengomzali uzakwazi ukuthi nyathelo bani ongalenza ukuze kulungiswe iphutha.
Sibonga uHulumende ngokwethula uhlelo lwe-Continuous Assessment Learning Activities (CALA), oselusondeze labazali eduzane lemfundo yabantwababo. Sesadlula isikhathi lapho okwakuthiwa abazali bathembe ababalisi. Nxa ungumzali osakwenza lokhu, tshintsha ukwenza.
I-CALA le eyaqala ukuba yingxenye yemihloliso ngoLwezi ka2021, isibe yinsika yokulandelela indlela abantwana abafunda ngayo. Abazali sebekwazi ukuthi abantwababo bafundani, njalo lokhu sekube yisibonelo sokuthi ukusondelela ezifundweni zabantwana kudala impumela enhle.
Asisukumeni njengabazali, sikhuthaze abantwabethu. Imfundo iligugu.
